«Қазақстан Ұлттық Олимпиада комитетінің президенті қызметіне Тимур Құлыбаев келгеннен бері елдің спорттық жетістіктеріміз құлдырай бастады. Мысалы, Токиодағы соңғы жазғы Олимпиада ойындарында біздің спортшылар бірде-бір «алтын» немесе «күміс» медаль алған жоқ, тек 8 қола медальмен қайтты. 

Ал медальдық есепте біздің еліміз 83 орынға бір-ақ түсті! 1994 жылдан 2014 жылға дейінгі Жазғы Азия ойындарында қазақстандық спортшылар тұрақты түрде 4-5 орын алып келген еді. 2018 жылы біз 9-шы орынға, ал 2023 жылы 11-ші орынға түстік! Шамамен, Парижде де осының кебін киюіміз әбден мүмкін. Тимур Құлыбаев келгелі Ұлттық Олимпиада комитетінің басшылығына кілең «Ескі Қазақстанның» өкілдері іріктеліп алынды. Оның ішінде, бір-біріне айнымас құда-жекжаттар мен миллиардер күйеудің олигарх-достары өріп жүр».

Мәжіліс депутаттары Ермұрат Бапи мен Абзал Құспан премьер-министр Әлихан Смайыловтың атына жолдаған депутаттық сауалында осылай деді. Депутаттардың ойынша, «Әділетті Қазақстан» Олимпиада комитетіне әлі жеткен жоқ. Осыларды алға тартқан халық қалаулылары Париждегі Олимпиада алдындағы лицензиялық спорттық турнирлерге бай-бағыландардың өкілін емес, ауылдан шыққан, көкірегінде намысы бар патриот, кәсіби спортшыларды апару қажеттігін,  спорт саласындағы жемқорлық пен сыбайластық, таныс-тамырлықты түбімен жоюды, Ұлттық Олимпиада Комитетінің басшылық құрамына ревизия жасап, оларды тек жас, Жаңа Қазақстан өкілдерімен жасақтау керектігін жазыпты. 

Тимур Құлыбаев Ұлттық олимпиада комитетіне 2015 жылдан бері жетекшілік етеді.