«Ауыл Берекенің» берекесі кірмей тұр

Oinet.kz 02-06-2020

 Жамбыл облысының әкімі Бердібек Сапарбаев Тараздағы бірқатар сауда орындарының жұмысымен танысты. Аймақ басшысы барған алғашқы нысан қаланың шығыс шетінде орналасқан «Ауыл Береке» базары болды. Онда облыс әкімі азық-түлік тауарларының ассортиментімен, сапасы және бағасымен танысып, сатушылар мен тұтынушыларды әнгімеге тартты. 

image.png

Бүгінгі таңда базардың жеміс-көкөністердің, құрылыс материалдары мен ауылшаруашылық өнімдерінің көтерме сауда секторы жұмыс істеуде. Карантинге байланысты азық-түлік емес тауарлар сауда бөліктері жабылған. Базар аумағын шолып шыққан аймақ басшысы  бірқатар маңызды мәселелерге тоқталды.

- Бұған дейін мен базар аумағын ретке келтіруді, сауда орындарын жақсартуды, ыңғайлы жағдай жасау мәселелеріне назар аударуды тапсырған болатынмын. Алайда, бұл нұсқаулар толығымен орындалмаған. Жайлы сауда павильондары жоқ. Кейбір сатушылар жерде сауда жасап отыр. Көлік құралдарының базардағы ретсіз қозғалысы өрт қаупін тудырады, - деді әкім.

Санитарлық-эпидемиологиялық талаптарды сақталуы да ойдағыдай емес. Сатушылар да, сатып алушылар да бетперде кимейді, адамдар арасындағы әлеуметтік арақашықтық сақталмайды.

- Нарық қызметкерлері азық-түлік емес сектордағы жұмысты қайта бастауды сұрауда. Алайда, базар әкімшілігі қажетті санитарлық талаптардың сақталуын қамтамасыз ете алмай отыр. Тиісті шаралар қабылдаңыздар, содан кейін ғана базардың толық ашу туралы айтуға болады. Пандемия кезінде біздің азаматтарымыздың денсаулығына қатысты қауіпсіздік шараларын елемеуге жол берілмейді, - деді Бердібек Сапарбаев базар басшылығына. Сондай-ақ, аймақ басшысы «Орталық» және «Атакент» базарларын ат басын бұрып, облыс орталығындағы демалыс саябақтарының аумағын аралап көрді.

Ерман ӘБДИЕВ,

Жамбыл облысы

Қаза болған полицейдің анасы Тоқаевқа хат жолдады
​Африкада тағы бір қауіпты індет тарауда

Сәйкес тақырыптар
Көтерілу
×