Шымкентте көші-қон заңнамасының сақталуын қамтамасыз етуге бағытталған «Заңсыз келуші – 2026» жедел-профилактикалық іс-шарасы өтіп жатыр. Шара Әл-Фараби ауданындағы көші-қон қызметі бөлімінің қызметкерлері тарапынан ұйымдастырылып, қала аумағында жүрген шетел азаматтарының Қазақстан Республикасының заң талаптарын сақтауын бақылауға бағытталған.

Рейд барысында шетел азаматтары жиі шоғырланатын орындарға ерекше назар аударылуда. Атап айтқанда, құрылыс нысандары, сауда орындары мен базарлар, қоғамдық тамақтану орындары, жатақханалар және жалдамалы пәтерлер тексеріліп жатыр. Қызметкерлер шетелдіктердің ел аумағында болу заңдылығын, тіркеу талаптарының орындалуын, сондай-ақ еңбек қызметін жүзеге асыруға қажетті құжаттарының болуын қарайды.

Іс-шараның тағы бір маңызды бағыты – шетел азаматтарын заңсыз еңбекке тарту фактілерінің алдын алу. Қазақстан аумағында жұмыс істейтін шетелдіктер белгіленген көші-қон және еңбек талаптарын сақтауы тиіс. Осыған байланысты жұмыс берушілердің де жауапкершілігі назарда болады. Заң талаптарын бұзған азаматтар мен ұйымдарға қолданыстағы заңнамаға сәйкес тиісті шаралар қабылданады.

Көші-қон саласындағы бақылау тек заң бұзушылықты анықтаумен шектелмейді. Мұндай профилактикалық жұмыстар құқықтық тәртіпті сақтау, көлеңкелі еңбек қатынастарының жолын кесу және қоғамдық қауіпсіздікке әсер етуі мүмкін тәуекелдердің алдын алуға мүмкіндік береді. Әсіресе құрылыс, сауда және қызмет көрсету салаларында еңбек ететін шетел азаматтарының құжаттық мәртебесін тексеру маңызды.

Бұл бағыттағы жұмыс Мемлекет басшысы айқындаған «Заң мен тәртіп» қағидатымен сабақтас. Қоғамдық тәртіптің орнығуы азаматтардың ғана емес, ел аумағында уақытша жүрген шетелдіктер мен оларды жұмысқа тартатын жұмыс берушілердің де заң талаптарын орындауына байланысты.

Полиция департаментінің мәліметінше, рейдтік іс-шара барысында анықталған әрбір құқық бұзушылық бойынша заңнамада көзделген шаралар қабылданады. Алдын алу және түсіндіру жұмыстары көші-қон тәртібін сақтауға, заңсыз еңбек қатынастарына жол бермеуге және қаладағы құқықтық тәртіпті нығайтуға бағытталған.