Шымкент қалалық Политехникалық колледжінде жастардың құқықтық мәдениетін қалыптастыруға және салауатты өмір салтын насихаттауға бағытталған «Заң мен тәртіп» жобасы аясындағы іс-шаралар жүйелі түрде жалғасып келеді. Соның бірі ретінде жуырда І және ІІ курс студенттеріне арналған «Аддиктивті мінез-құлық: психобелсенді заттарды қолдану» тақырыбында танымдық сабақ ұйымдастырылды.

Іс-шараны «Шымкент қаласы кәсіподақтар орталығы» аумақтық кәсіподақтар бірлестігінің төрағасы Бауыржан Алтеев жүргізді. Кездесудің мақсаты – жастар арасында зиянды әдеттердің алдын алу, психобелсенді заттардың адам өміріне тигізетін кері әсерін түсіндіру және студенттердің саналы таңдау жасау дағдыларын дамыту.

Сабақ барысында қатысушыларға тәуелділік ұғымының мәні, оның қалыптасу себептері мен салдары жан-жақты түсіндірілді. Мамандар зиянды әдеттердің адамның денсаулығына ғана емес, психологиялық жай-күйіне, әлеуметтік ортасына және болашақ өміріне де кері ықпал ететінін атап өтті. Әсіресе жасөспірім шақта қабылданған қате шешімдердің кейінгі тағдырға әсері зор екені нақты мысалдар арқылы түсіндірілді.

Кездесу барысында Бауыржан Алтеев жастарға өмірлік ұстаным мен жауапкершіліктің маңызы туралы ой қозғады. Оның айтуынша, психобелсенді заттар адамның ойлау қабілетін әлсіретіп, ерік-жігерін төмендетеді және алға қойған мақсаттарына жетуіне кедергі келтіреді. Сондықтан жастардың білім алып, кәсіби тұрғыдан қалыптасатын кезеңде дұрыс таңдау жасауы ерекше маңызды.

Сабақтың тәжірибелік бөлімі студенттердің қызығушылығын арттырды. Интерактивті тапсырмалар мен рөлдік ойындар арқылы қатысушылар түрлі өмірлік жағдайларды талдап, қиын сәттерде дұрыс шешім қабылдау жолдарын қарастырды. Әсіресе «Досыңа не айтасың?» атты жаттығу жастардың пікір білдіру, кеңес беру және өз көзқарасын ашық жеткізу қабілеттерін дамытуға мүмкіндік берді.

Пікірталас барысында студенттер тәуелділіктің адам өмірін тығырыққа тірейтін қауіпті құбылыс екенін тереңірек түсінді. Сонымен қатар олар психологиялық қысым мен түрлі манипуляциялардың белгілерін ажыратып, өз ұстанымын қорғаудың тиімді тәсілдерін меңгерді. Мамандар зиянды ұсыныстардан батыл бас тарту, өзін-өзі бақылау және жауапкершілікпен әрекет ету дағдыларының маңыздылығына ерекше тоқталды.