Шымкент қаласында қоғамдық қауіпсіздікті қамтамасыз ету және құқық бұзушылықтардың алдын алу мәселелері бойынша ведомствоаралық комиссия мен Нашақорлыққа қарсы іс-қимыл штабының бірлескен отырысы өтті. Жиынға қала әкімі Ғабит Сыздықбеков төрағалық етті.

Отырысқа құқық қорғау және арнайы органдардың басшылары, прокуратура өкілдері, аудан әкімдері мен басқарма жетекшілері қатысты. Сонымен қатар бейнеконференция арқылы Қазақстан Республикасы Ішкі істер министрлігі Профилактикалық жұмысты үйлестіру комитетінің төрағасы Арман Саданов пен ведомство өкілдері қосылды.

Жиында қоғамдық тәртіпті сақтау, интернет-алаяқтықтың алдын алу, меншікке қарсы қылмыстармен күрес, ойын-сауық орындарындағы құқық бұзушылықтар және кәмелетке толмағандар арасындағы тәртіп мәселелері жан-жақты талқыланды. Сондай-ақ білім беру ұйымдарында есірткі құралдарының таралуына жол бермеу бағытындағы жұмыстарға ерекше назар аударылды.

Қатысушылар қазіргі таңда қоғамдық қауіпсіздік мәселесі жаңа сипатқа ие болғанын атап өтті. Цифрлық технологиялардың қарқынды дамуы интернет-алаяқтықтың көбеюіне әсер етсе, жастар арасындағы құқық бұзушылықтар мен есірткінің заңсыз айналымы қоғам үшін өзекті мәселеге айналып отыр. Сондықтан алдын алу шараларын күшейтіп, мемлекеттік органдар арасындағы өзара іс-қимылды жетілдіру маңызды.

Жиында «Қауіпсіз қоғам» жобасының нәтижелері де сөз болды. Бүгінде қала көшелерінде, қоғамдық орындар мен жол қиылыстарында орнатылған бейнебақылау камералары құқық бұзушылықтарды анықтауға және олардың алдын алуға тиімді ықпал етіп келеді. Заманауи бақылау жүйелері күдікті әрекеттерді дер кезінде анықтап, құқық қорғау органдарының жедел әрекет етуіне мүмкіндік береді.

Мұндай технологиялар қылмыстың ашылу көрсеткішін арттырып қана қоймай, тұрғындардың қауіпсіздік деңгейін де күшейтеді. Әсіресе балалар мен қарттар үшін қолайлы әрі қауіпсіз орта қалыптастыруда бұл жобаның маңызы зор.

Жиын қорытындысында қоғамдық қауіпсіздікті қамтамасыз ету тек құқық қорғау органдарының ғана емес, барлық мемлекеттік мекемелер мен қоғам өкілдерінің ортақ міндеті екені атап өтілді. Ал заң мен тәртіп қағидаттарын нығайту – қауіпсіз әрі тұрақты қоғам қалыптастырудың басты кепілі.