АҚШ президенттігіне үміткер Дональд Трампқа тағы да қастандық жасалды, деп хабарлайды Ulysmedia.kz.

New York Post басылымы таратқан мәліметке сәйкес, АҚШ-тың құпия қызметі Дональд Трамп Флорида штатындағы Вест-Палм-Бичтегі гольф-клубынан шығып бара жатқан кезде атыс болғанын байқаған. 

Өкілдер палатасының мүшесі Марджори Тейлор-Грин қазіргі уақытта Трампқа ешқандай қауіп төніп тұрмағанын айтты. 

Трамп оның маңайында болған атыстан соң қауіпсіз жерге орналастырылды. Әзірге басқа ақпарат жоқ, - деп жазды Х әлеуметтік желісіндегі парақшасында Марджори Тейлор-Грин. 

Еске салсақ, АҚШ-та 13 шілде күні президенттікке кандидат әрі елдің бұрынғы президенті Дональд Трамптың Пенсильвания штатында өтіп жатқан сайлауалды үгіт-насихат митингі кезінде оған қастандық жасалған еді. Кейін экс-президентті кім атқаны анықталған.

Мемлекет басшысы Қасым-Жомарт Тоқаев АҚШ-тың бұрынғы президенті, кезекті президенттік сайлау үміткері Дональд Трампқа жасалған қастандық жайлы жаңалыққа бейжай қарамай, өз пікірін білдіріп, қатаң айыптады.