Қазақстан президенті Қасым-Жомарт Тоқаев 25 жыл бұрын Нұрсұлтан Назарбаев таратқан үш облысты қайта қалпына келтірді. DW сайтына пікір білдірген сарапшылар Қазақстанның екінші президентінің салиқалы қадамына талдау жасайды. Бұл жөнінде Stan.kz ақпарат агенттігі хабарлайды.

8 маусымнан бастап Қазақстан картасында бұрыннан бар 17 облысқа республикалық маңызы бар тағы үш әкімшілік аймақ қосылды. Олар орталығы Семей қаласында орналасқан Абай облысы, Жетісу облысы (орталығы Талдықорған) және Ұлытау облысы (орталығы Жезқазған).

Жоғарыда аталған өзгерістердің барлығы президент Қасым-Жомарт Тоқаевтың 2022 жылғы 4 мамырдағы жарлығына сәйкес енгізілген. Сарапшылар Қазақстан халқының көп бөлігі бұл құжатты қуана қабылдағанын айтады. Президент қазақ мемлекеттілігінің қалыптасуында орасан зор рөл атқарған Семей және Жезқазған қалаларына ең алдымен облыс орталықтарының мәртебесін қайтару арқылы тарихи әділеттілікті қалпына келтірді деген пікір бар.

Бұл өзгерістер Қазақстанның тұңғыш президенті Нұрсұлтан Назарбаев өзінің жарлығымен Семей, Жезқазған және Талдықорған облыстарын таратып, олардың аумақтарын тиісінше Шығыс Қазақстан, Қарағанды және Алматы облыстарына қосқан уақыттан тура ширек ғасыр өткен соң болды. Семей, Аягөз және Үржар өңірлерінің мәртебесін жоғалтып алғанына алаңдаған жергілікті тұрғындардың наразылығына қарамастан, Назарбаев өз шешімін өзгеріссіз қалдырған еді. Ол мұны кеңестік кезеңнен бері шектен тыс қымбаттаған мемлекеттік аппаратты қысқарту қажеттілігімен түсіндірген.