І

Сəулең – реңімде,

Нұрға толы – уысым.

Келдім бұл өмірге

Сені көру үшін.

Көптің бірі дерсің,

Келдім күю үшін.

Келдім, ұлы көршім,

Сені сүю үшін!

Келдім жайлануға –

Ұзақ күткеніме.

Мəңгі байлануға

Қызыл жіптеріңе.

Келдім үміт тағып,

Алтын кейіпкерге.

Ал, түн құлыпталып,

Қалсын сейфтерде...

ІІ

Белгілі сенен безбесім,

Белгісіз кейде жоқ-барым.

Жердегі мұңды көздесін

Самсаған сəуле-оқтарың.

Мейірім ғана озардай

Өмірде мынау кіл жарыс.

Жүзіңнен сенің көз алмай,

Қараған мен бір – күнбағыс...

Алысқа жетер бір үнмін,

Алаула жүрек төрінде –

Адалдық жайлы жырымның

Ең ғажап деген жерінде!

Жетесің жалғыз бəріне,

Аман бол бақыт – от демі.

Махаббат жайлы əніме

Қайырма болып көктегі...