Мемлекет басшысы Қасым-Жомарт Тоқаев Украина президенті Владимир Зеленскиймен кездесті, деп хабарлайды Ақорда.

Кездесу барысында Қасым-Жомарт Тоқаев пен Владимир Зеленский бірін-бірі өз мемлекеттеріндегі ең жоғары қызметке сайлануларымен құттықтады.

Мемлекет басшысы екі ел арасындағы тарихи тамырластық пен ортақ болашақ жайын атап өтті. Қасым-Жомарт Тоқаев Украинамен арадағы саяси және сауда-экономикалық ынтымақтастықты одан әрі дамытуға дайын екенін, бұл бағыттағы мүмкіндіктеріміз зор екенін айтты.

Кездесу соңында Қасым-Жомарт Тоқаев пен Владимир Зеленский бір-бірін өз мемлекеттеріне сапармен келуге шақырды.

Айта кетейік, АҚШ-та сапармен жүрген мемлекет басшысы Украина президентінен бөлек, Иордания Королі ІІ Абдалла, Грузия президенті Саломе Зурабишвили, Польша президенті Анджей Дуда, Болгария президенті Румен Радев, Швейцария Конфедерациясының президенті Ули Маурермен кездесті.