Сарыағаш ауданы кәсіпкерлік және ауыл шаруашылығы бөлімі және Жастар ресурстық орталығының ұйымдастыруымен аудан жастары Көктерек кентіндегі табиғи минералды судың негізінде, «Hydro Life» шипажайымен танысты. Бұл туралы Сарыағаш ауданы Жастар ресурстық орталығы хабарлады.  

Іс-шараның мақсаты жастарды жаңашылдыққа, білім мен ғылымды игеруге және кәсіпкерлікке баулу.

Шипажайдың басшысы жаңа бағыттағы мамандықтарды игеруге, жаңа кәсіп көздерін ашуға бағыт-бағдар беріп, жастардың сұрақтарына жауап берді.

Мұның алдында  Сарыағаш ауданы кәсіпкерлік және ауыл шаруашылығы бөлімі және Жастар ресурстық орталығының ұйымдастыруымен Жарты төбе ауылдық округінде «Келесгидрострой» ЖШС құрамындағы «Дархан» гидроэлектр станциясымен жастар танысты. 

Жастар аймақта электр жарығымен қамтып отырған станцияның жұмыс істеу технологиясымен танысып, қызығушылықтарын танытты. Осындай шаралар жастардың кәсіпкерліктің қыр-сырын үйренуге, өзі кәсібін бастауға, түптеп келгенде өмірден өз орнын табуға ықпал етеді. Абай атамыз айтпақшы, "Біріңді қазақ бірің дос, көрмесең істің бәрі бос". Бүгінде мемлекет тарапынан  кәсіпкерлікті дамытуға өте көп жағдай жасалуда. Өз ісімді ашамын дегенге мүмкіндік көп. Осы мүмкіндіктерді пайдаланып, бизнесін дөңгелетіп жатқандар да аз емес.