Шымкентте цифрландыру мен жасанды интеллектіні дамытуға басымдық беріліп, технологиялық орта қалыптастыруға бағытталған жұмыстар жүйелі түрде жүргізіліп келеді. Бұл үдерісте жастардың IT саласына қызығушылығын арттырып, жаңа жобаларға жол ашатын алаңдардың маңызы зор. Солардың бірі – жастарды, IT мамандарын және стартап-командаларды біріктіріп отырған «Shymkent IT HUB» технопаркі.

Технопаркта цифрлық дағдыларды жетілдіруге, IT-қоғамдастықты дамытуға және инновациялық идеяларды қолдауға арналған түрлі жобалар жүзеге асуда. Биыл мұнда 44-ке жуық іс-шара ұйымдастырылып, оған 1041 адам қатысты. Ал 168 студент оқу және өндірістік тәжірибеден өтіп, цифрлық бағыттағы білімін тәжірибемен ұштастырды.

IT саласындағы жаңа идеяларды қолдау жұмыстары да назардан тыс қалған жоқ. Жыл басынан бері 5 стартап-жоба іске асырылып, 2 хакатон өткізілді. Мұндай алаңдарда жастар өз идеяларын таныстырып қана қоймай, оларды технологиялық өнімге айналдырудың жолдарын іздейді.

Бүгінде технопарк резиденттері қатарында QazTracker, Alaqan, Puls.kz, Art Code, Florax және Qalam AI секілді жобалар бар. Олардың бағыттары әртүрлі болғанымен, ортақ мақсаты – технологиялық шешімдер арқылы нақты мәселелерге жауап беретін өнімдер әзірлеу.

ЖИ технологияларының кеңеюі IT мамандарына қойылатын талаптарды да өзгертіп жатыр. Бағдарламалау, деректермен жұмыс істеу, цифрлық өнім әзірлеу сияқты бағыттармен қатар, жасанды интеллект мүмкіндіктерін тиімді пайдалану да маңызды дағдыға айналды. Сондықтан Шымкентте осындай технологияларды меңгеруге жағдай жасау қаланың цифрлық дамуы үшін қажетті бағыттардың бірі болып отыр.

Жасанды интеллектінің қолданыс аясы кеңейіп жатқан кезеңде мұндай жобалардың қалыптасуы Шымкенттің цифрлық ортасын дамытуға жаңа мүмкіндік береді. IT саласына енді қадам басқан жастар үшін де технопарк тәжірибе жинап, мамандармен араласуға, идеяны сынақтан өткізуге және стартап мәдениетін меңгеруге жағдай жасап отыр.

Цифрландыру тек жаңа технологияларды енгізумен шектелмейді. Оның нәтижесі сол технологияны меңгеретін мамандардың дайындығына да байланысты. Осы тұрғыдан алғанда, «Shymkent IT HUB» алаңы жастардың цифрлық құзыретін күшейтіп, қаланың технологиялық әлеуетін арттыруға бағытталған жұмыстың бір бөлігіне айналып отыр.