Балалардың өмірі мен денсаулығын қорғау – қоғам мен мемлекеттің басты міндеттерінің бірі. Әсіресе жол-көлік оқиғаларының алдын алу, жасөспірімдердің қауіпсіздік ережелерін меңгеруі және ата-аналардың жауапкершілігін арттыру бүгінгі таңда ерекше маңызға ие. Шымкент қаласы Еңбекші ауданының прокуратурасы балалардың, ата-аналардың және заңды өкілдердің қатысуымен жол қозғалысы қауіпсіздігін қамтамасыз етуге бағытталған кең көлемді түсіндіру жұмыстарын өткізді. Іс-шараның басты мақсаты – балалардың жолдағы қауіпсіздік мәдениетін қалыптастырып, жол-көлік оқиғаларының алдын алу және ата-аналардың осы бағыттағы жауапкершілігін күшейту.

Кездесу барысында мамандар балаларға жолдан тек арнайы белгіленген жаяу жүргіншілер өткелі арқылы өту, бағдаршамның талаптарын бұлжытпай орындау, көлік жүретін бөлікке кенеттен жүгіріп шықпау және жол бойында аса мұқият болу қажеттігін жан-жақты түсіндірді. Сонымен қатар үлкен жүк көліктері мен арнайы техникалардың айналасында көріну аймағы шектеулі болатыны, сондықтан олардың жанында ерекше сақтық таныту керектігі айтылды.

Прокуратура қызметкерлері балалардың қауіпсіздігі тек мектеп пен құқық қорғау органдарының ғана емес, ең алдымен ата-аналардың жауапкершілігі екенін ерекше атап өтті. Сондықтан ата-аналар мен заңды өкілдерге балалармен күн сайын жол қозғалысы ережелері туралы әңгімелесіп, оларды қауіпсіз жүріп-тұруға үйрету және ең бастысы, өздерінің жеке үлгі көрсетуі маңызды екені ескертілді. Себебі бала көбіне үлкендердің іс-әрекетіне қарап бой түзейді.

Жол қозғалысы мәдениетін ерте жастан қалыптастыру – қайғылы оқиғалардың алдын алудың ең тиімді жолдарының бірі. Қарапайым ғана қауіпсіздік қағидаларын сақтау көптеген жазатайым жағдайлардың болуына жол бермейді. Әрбір сақталған ереже – баланың өмірі мен денсаулығын қорғауға қосылған нақты үлес.

Еңбекші ауданы прокуратурасы алдағы уақытта да балалардың қауіпсіздігін қамтамасыз етуге бағытталған профилактикалық және ағартушылық жұмыстарды жалғастырады. Мұндай бастамалар қоғамда қауіпсіздік мәдениетін нығайтып, ата-аналар мен балалардың құқықтық және әлеуметтік жауапкершілігін арттыруға ықпал етеді.