Арыста оқ-дәрі қалдықтарын жою жұмыстары жалғасады

Oinet.kz 01-04-2024 215

e62b6fd339b47a433b81b08ec50d12a8_1280x720.jpg

Қорғаныс министрлігінің Ақпараттық-түсіндіру тобы Түркістан облысының Арыс қаласында және Жамбыл облысының Сарыкемер ауылында болды. Кездесулер жергілікті атқарушы билік әкімдерінің, облыстық қорғаныс істері жөніндегі департаменттер басшыларының, мектеп директорларының және қоғам өкілдерінің қатысуымен өтті. Бұл туралы аталған министрліктің ресмми сайты хабарлады.

 Қорғаныс министрлігі Тәрбие және идеологиялық жұмыстар департаментінің бастығы әділет полковнигі Тілеухан Басқожаев биылғы жылдың бірінші сәуірінен бастап әскери бөлімдер мен жақын маңдағы елді мекендер маңайын оқ-дәрілер фрагменттерінен тазарту жұмыстары қайта басталатынын мәлімдеді.  

– Қорғаныс министрлігі жарамсыз оқ-дәрілерді қауіпсіз сақтауды қамтамасыз ету мен оларды кәдеге жарату бойынша жұмыс жүргізуде. Оларды сақтау объектілерін жетілдіру шаралары қабылдануда. Бұл іс-шаралар «Қауіпсіз ел» ұлттық жобасын іске асыру аясында жоспарлы түрде жүзеге асырылып келеді, – деп атап өтті әділет полковнигі Т. Басқожаев. 

Қорғаныс ведомствосының өкілі бұл шараға саперлік бөлімшелер жұмылғанын хабарлады. Жиналған оқ-дәрі қалдықтары жару әдісімен жойылады. Бақыланатын жарылыстар елден тыс жерлерде, арнайы бөлінген шалғай учаскелерде жүргізілетін болады. Жүргізіліп жатқан жұмыстар жергілікті тұрғындарға қауіпті емес. 

Департамент бастығы сонымен қоса кездесуге қатысушыларға көктемгі әскерге шақыру барысы және әскерде қызмет еткен азаматтарға берілетін жеңілдіктерге тоқталды.  

Ол әскери қызмет өткеру кезеңінде борышын өтеуші сарбаз ай сайынғы несие төлемдерінен босатылатынын айтты. Ал қызмет аяқталғаннан кейін запасқа шығарылған адам екі жыл ішінде ҰБТ тапсырмай, ақылы түрде ЖОО-ға түсу құқығын пайдалана алады. Қызмет барысында жауынгерлік және мемлекеттік-құқықтық дайындықта үздік нәтиже көрсеткендер мемлекеттік грантқа ие болады. Бұл құқықты олар бір жыл ішінде пайдалана алады.  

Кездесу соңында әділет полковнигі Тілеухан Басқожаев көпшіліктің сұрақтарына жауап берді.

 

 


Қанат Бозымбаев вице-премьер болып тағайындалды
Наталья Годунова қызметінен босатылды
Сәйкес тақырыптар
Көтерілу