Президент: Әкімдер инвестиция тартудың орнына ескі әдетке салып, бюджет қаражатына сеніп отырады

Oinet.kz 08-02-2024

image.png

Президенттің сөзінше, аймаққа жеке инвестиция тарту әкімдердің ең басты міндетінің бірі болуы керек.

Мемлекет басшысы Қасым-Жомарт Тоқаев Үкіметтің кеңейтілген отырысында мемлекеттік органдар ел экономикасына мейлінше көбірек инвестиция тартуға баса мән беруге тиіс екенін айтты деп хабарлайды Informburo.kz.

"Инвесторларға, мысалы, 50 миллион доллардан көп қаржы салуға дайын ірі компанияларға "бір терезе" қағидасымен жан-жақты қолдау көрсеткен жөн. Сонымен қатар, жобалардың іске асырылуын қадағалайтын тиімді мониторинг жүйесін іске қосу керек.Мемлекеттік органдар пайдасы жоқ презентациялар мен іс-шаралар өткізумен әуестенбеуге тиіс. Мекеме басшыларының шетелге жасаған әрбір іссапары нақты нәтиже беруге тиіс. Сапар қорытындысы бойынша Үкімет басшылығына, немесе, қажет болған жағдайда Президентке есеп берілуі керек", – деді Қазақстан президенті.

Мемлекет басшысы инвестициялық жобаларды іске асыруға қатысты кедергілер, әсіресе, аймақтарда жиі болып тұратынына тоқталды.

"Әкімдер инвестиция тартудың орнына ескі әдетке салып, бюджет қаражатына сеніп отырады. Ал, аймақтарға барып, жұмыс істегісі келетін инвестор көптеген тосқауылға тап болады. Жергілікті билік көп жағдайда ешқандай әрекет жасамайды не болмаса инвесторды әуре-сарсаңға салады. Соның кесірінен кәсіпкер жобасын кейінге шегереді немесе біржола тоқтатуға мәжбүр болады", – деді Тоқаев.

Президент аймаққа жеке инвестиция тарту әкімдердің ең басты міндетінің бірі болуы керек деп айтты.

"Жалпы, барлық мемлекеттік орган ел экономикасына мейлінше көбірек инвестиция тартуға баса мән беруге тиіс. Бұл – негізгі басымдық, олардың жұмысы да соған сәйкес бағалануы керек. Мәселе штат санын көбейтіп, жұмыс тобын құрып, жаңа тұжырымдама жазуда емес. Бұл, ең алдымен, мемлекеттік аппараттың жұмыс істеу тәсілін өзгертетін нақты реформа. Соны дұрыс түсіну қажет.Біз жарты жылдың нәтижесі бойынша Инвестициялық штабтың жұмысын қорытындылаймыз. Әрбір министр мен әкімнің осы бағытта атқарған жұмысына нақты баға береміз. Талап қатаң болады", – деді мемлекет басшысы.

Түркістанда екі баланың денесі табылды. Күдікті анасы
Мақсұт Исаховтың ақталуы мүмкін бе?
Сәйкес тақырыптар
Көтерілу