Құрылыс саласы Президент Жолдауының негізгі бағыты болып қала береді. Өйткені құрылыс барлық салаға қатысты. Халықты тұрғын үймен қамту, жол-көлік логистикасы, таза ауыз су, көгілдір отын жеткізу мен индустриалды аймақтардың да дамуы осы құрылыс саласына тікелей байланысты. 

Тұрғын үй құрылысы бойынша да елімізде көп жұмыс атқарылуда. Мәселен, жаңа жыл қарсаңында Ордабасы ауылында әлеуметтік тұрғыдан осал азаматтарға баспана берілді.

Түркістан облысы әкімінің бірінші орынбасары Зұлпыхар Жолдасовтың айтуынша, Ордабасы ауданында әлеуметтік тұрғыдан осал топтағы азаматтарға арналып салынған жаңа баспаналардың құрылысы аяқталып, ел игілігіне пайдалануға тапсырылды. Жалпы 12 отбасы жаңа үйлердің кілттерін алып, қоныс тойын тойлады. 

Президент тапсырмасымен облысымызда қолға алынған жобалар көп. Соның ішінде «Жайлы мектеп» жобасы, «Нұрлы жол», «Баспана» тағы басқа да көптеген бағдарламалар мен жобалар бар. Бүгінгі күні құрылыс жұмыстарының ауқымы бойынша Түркістан облысы республикада үздіктердің қатарында. Бүгін аталған саладағы құрылыс жұмыстары аймақ басшысы Дархан Сатыбалдының жеке бақылауында. Оның бұлайынша бақылауда болуының да өзіндік себебі бар. Өйткені әрбір әлеуметтік нысанның артында халықтың сұранысы мен тілегі тұр. Алдымен жауапты басқарма, аудан, қала әкімдері құрылыс барысын қадағалап, уақтылы тапсырылуына барынша жағдай жасауда. Сонымен бірге басқарма мен аудан және қала әкімдері де құрылысқа жауапты мердігерлердің күнделікті жұмысын қадағалап отырады. Ал жаңа жыл қарсаңында Ордабасы ауданында 12 отбасына берілген баспаналар жаңа заманауи баспаналар хай-тек стильде салынған, аулалар темір қоршаумен қоршалған. Су және жылу жүйелері толық орнатылған. Тұрғын үйлерде тұрғындардың жайлы өмір сүруіне барлық жағдай жасалған. Әр пәтер 3 бөлмелі, жалпы алаңы 62,5 шаршы метрді құрайды, – дейді Зұлпыхар Жолдасов.

Жайлылық дегеніміз – ең алдымен, тұрғын үйдің қолжетімділігі, ауланың әдемілігі мен қауіпсіздігі, тіршілікке және жұмысты істеуге қолайлы елді мекеннің сапалы инфрақұрылымның болуы. Осы бағытта қабылданған мемлекеттік бағдарламалар мен жобалар бүгінде аймақта табысты іске асырылуда. Аудандағы елді мекендерде тұрғын үй салуға бөлінген жер телімдері бойынша инженерлік коммуникациялық инфрақұрылым тарту жұмыстары да құрылыс талаптарына сай жүргізілуде.

Бұл қуанышты іс-шараға Түркістан облысы әкімінің бірінші орынбасары Зұлпыхар Жолдасов, аудан әкімі Азат Оралбаев арнайы қатысып, тұрғындардың қуанышын бөлісті.

– Биыл облыс көлемінде әлеуметтік жағынан осал топтағы азаматтардың өмір сапасын жақсарту үшін бірқатар маңызды шаралар атқарылды. Жеке инвесторлармен бірлесіп, тұрғын үй құрылысы жүйелі түрде жүзеге асырылуда. Осылайша, тұрғын үй кезегінде тұрған түрлі санаттағы азаматтар баспаналы болды, – деген облыс әкімінің бірінші орынбасары тұрғындардың сапалы әрі жайлы өмір сүруі үшін барлық жағдай жасалған жаңа баспаналар өңірдің әлеуметтік инфрақұрылымын жаңғыртуға қосылған үлкен үлес екенін атап өтті.