Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында Әлеуметтік тұрғыдан осал азаматтарға қолдау көрсету – өте маңызды міндет екенін атап өтті.

«Балалы отбасыларды қолдау үшін сәби күтіміне өтемақы төлеу мерзімі бір жылдан бір жарым жылға дейін ұзарды. Зиянды еңбек жағдайында жұмыс істейтін азаматтарға биылдан бастап арнайы төлемдер беріліп жатыр. «Ұлттық қор – балаларға» ауқымды жобасы іске қосылды. 7 миллион баланың есепшотына Ұлттық қордың табысынан жалпы сомасы 300 миллиардтан астам теңге аударылды» деді Президент Жолдауында. 

«Қуанса, бала қуансын» деген қанатты сөздің түпкі мағынасын оңалту орталықтарында қызмет алып жүрген балаларды жүзінен қуаныш табын көргенде түсінесің. Әрине, әрбір жанның тағдыры әртүрлі. Оларға қарап тұрып жүрегің ауырады, көңілің құлазитын кездер де көп болады. Бірақ балалардың өмірге деген ұмтылысын, құштарлығын көріп, оларға кішкене болса да көмектескің, қол ұшын бергің келіп тұрады. Міне Түркістан қаласында мүмкіндігі шектеулі азаматтарға Жаңа жыл мерекесі ұйымдастырылды. Оның ұйымдастырушысы Түркістан қаласы әкімдігінің Жұмыспен қамту және әлеуметтік бағдарламалар бөлімі. Осы бөлімнің қолға алған бұл бастамасы ерекше жандарға қуаныш сыйлады. 

Мерекелік кештің шымылдығын Түркістан қаласы әкімінің орынбасары Мекенхан Қырықбаев жүрекжарды құттықтауымен ашты. Шараға арнайы қатысқан қалалық мәслихат төрағасы Ғаппар Сәрсенбаев да өзінің жылы лебізін білдірді.

Кеш барысында ерекше жандар өз өнерлерін көрсетіп, көпшіліктің ықыласына бөленді. «Орталыққа келетін әбрбір баланың мінез-құлқы, көңілі әртірлі болып келеді. Олар үйде отырғаннан көрі орталықта, көпшілік іс-шараларда көбірек уақыт өткізгенді қалайды. Өйткені олар мұнда достар табады, бір-біріне бауыр басып, іздеп тұрады. Олармен жұмыс, әрине, үлкен жауапкершілікті талап етеді. Бірақ қызмет алушылардың ой өрісінің дамуы, олардың бір баспалдақ болса да көтерілгенін көргенде, қатты қуанып, жұмысқа деген жігерім арта түседі. Бұл мамандық менің өмірлік серігім болып қала береді» дейді Түркістан қаласы әкімдігінің Жұмыспен қамту және әлеуметтік бағдарламалар бөліміне қарасты орталық маманы.

Мерекелік концерттің соңында қатысушыларға арнайы сыйлықтар табысталып, шара мейірім мен қуанышқа толы сәттермен аяқталды.

Бұл мерекелік шара ерекше жандарға қуаныш сыйлап қана қоймай, қоғамның жылы қарым-қатынасы мен қамқорлығын тағы бір мәрте айшықтай түсті.