Мемлекет басшысы Қасым-Жомарт Тоқаев ұлықтау рәсімінде өзінің ең алғашқы Жарлығын ауылды дамытуға арнаған болатын.  

«Мен сайлауалды сөздерімде ауылды өркендету ісіне баса назар аудардым. Бүгінде Қазақстан халқының 40 пайызға жуығы ауылда тұрады. «Ауыл – ел бесігі» деп халқымыз бекер айтқан жоқ. Сондықтан, ауылдағы жағдайды жақсарта алмасақ – бәрімізге сын. Сол үшін мен бүгін ауылды дамыту мәселесі туралы Жарлыққа қол қоямын», – деді. Сөйтіп Қазақстан Республикасы Ұлттық экономика министрлігіне «Қазақстан Республикасының ауылдық аумақтарын дамытудың 2023-2027 жылдарға арналған тұжырымдамасының» жобасын дайындауды тапсырған болатын. Бүгінгі күні бұл жоба халыққа таныстырып, жұмыс істеуде. Яғни, Президетттің Ұлттық экономика құрылымында баса мән беріп отырғаны халықты тұрғын үймен, таза ауыз сумен, көгілдір отынмен, жалпы ауыл тұрғындарының әлеуметтік жағдайын көтеру. Яғни, мұның барлығы құрылыс саласымен байланысты екені де белгілі. 

Сонымен ауылдық аумақты дамытуға бағытталған тұжырымдаманың аясында Келес ауданда көп жұмыс атқарылды. Халықты баспанамен қамтудың тағы бір жолы – үй салу үшін кезекте тұрған азаматтарға жер телімін үлестіру. Қазіргі таңда ауданда жер телімін алу үшін он мыңнан аса  адам кезекте тұр. Өткен жылдары бірнеше елді мекендегі жаңа тұрғын үй алқабына электр желісін, ауыз су, көгілдір отын тарту, қиыршық тас төсеу секілді жұмыстар жүргізіліп, кезектілікке сәйкес мыңға мыңнан аса жер телімі халыққа үлестірілген. 

Келес ауданының әкімі Жәнібек Ағыбаевтың айтуынша, ауданда тұрмысы төмен отбасылардың мәселесі соңғы бірнеше жылдан бері «Асар» жобасы аясында шешімін тауып келеді. Халқымызға тән осы дәстүр талай отбасының баспаналы болуына септігін тигізді. Бүгінгі күні осы жоба аясында әлеуметтік аз қамтылған, мүмкіндігі шектеулі, көпбалалы отбасы секілді қоғамның осал топтарына жеке тұрғын үй салып беру үшін ауданда 5 тұрғын үйдің құрылысы жүргізілуде. Жаңа баспанаға таза ауыз су, көгілдір отынын тарту, электр желісімен қамту, барлығы да демеушілердің, қалталы кәсіпкерлер мен ауыл тұрғындарының көмегімен іске асырылуда. 

Бүгінгі күні жаңа тұрғын алқаптар көгілдір отын, электр энергиясы, таза ауызсу желісі мен жол инфрақұрылымын жүргізбейінше берілмейтіні белгілі. Осы жұмыстар атқарылғаннан кейін жер телімдері кезекте тұрған азаматтарға заң талаптарына сәйкес үлестіріледі. Әрине ол кезек биліктің қатаң қадағалауымен жүргізіледі. Бүгінде Абай ауылындағы жаңа тұрғын үй алқаптарын электр энергиясы желісімен қамтамасыз ету үшін құрылыс жұмыстары жалғасуда. 

-Бір атап өтерлігі соңғы жылдары ауданда таза ауыз сумен және көгілдір отынмен қамту жұмыстары қарқынды жүргізілуде. Бүгінде аудан бойынша жалпы 83 елді мекеннің 59 елді мекені таза ауыз сумен қамтылған. 10 елді мекенде жер асты суын іздеу барлау жұмыстары және аудан аумағында су нысандарын реттеу, су шаруашылығын тиімді жүргізу, каналдарды жөндеу жұмыстары қарқынды жүруде. Қазіргі таңда «Келес Қызмет» коммуналдық мемлекеттік мекемесі тарапынан аудан көлемінде 23 елді мекенге ауыз су беріледі. Келес ауданының елді мекендерін қосымша таза ауыз сумен қамтамасыз ету мақсатында, Зах каналынан магистралды су құбырын, су тазарту арқылы нысаны бойынша жобалау-сметалық жұмыстары жүруде. Біз жаңа жыл қарсаңында Майдабозай елді мекенінде жаңа су нысанының құрылыс жұмысын аяқтап, ел игілігене бердік. Бүгінгі күні ондағы 41 үйдің 409 тұрғыны сапалы тіршілік нәріне қол жеткізіп отыр.  Жауапты мамандарға жұмыстың сапалы болып қажетті суды толық жеткізіп беру міндеттелді.  Су – тіршілік көзі! Су – біздің өміріміз бен денсаулығымыздың қайнар көзі, алтыннан құнды. Сондықтан құрметпен және қамқорлықпен қарағанымыз жөн, - деді аудан басшысы Жәнібек Есенұлы.

Ауданда елді мекендерді газдандыру ісі де назардан тыс қалмаған. Бұл бағытта тиісті жұмыстар жоспарлы іске асырылуда. Сондай-ақ елді мекеннің  көшесіне жарықтандыру орнатылуда. 

– Биыл аудандық маңызы бар жолдарға орта жөндеу жұмыстары жүргізілді. Жол құрылысына бірнеше миллион теңге бөлініп, ондаған жоба іске асырылды. Нәтижесінде бірнеше километр жол жөндеуден өткізілді. 

Бүгінгі күні Келес ауданы аумағында және ауылдық елді мекендерде қар тазалау жұмыстары жүргізілуде. Әлеуметтік маңызы бар нысандар, мектеп, аурухана және өзгеде маңызды нысандарға апаратын автокөлік жолдары толық тазартылуда. Ал аудан орталығы Абай ауылы аумағындағы ішкі көшелеріне автомобиль жолдарын тазалауға «Келес қызмет» каммуналдық мемлекеттік мекемесі тарапынан жолдарға инертті материалдар (құм, тұз) себу жұмыстары жүргізілуде. Жалпы тазалауға 4 техника 14 жұмысшы жұмылдырылды. Сонымен қатар, ауыл және ауылдық округтер әкімшіліктерінде қыс мезгілінде төтенше жағдайларды алдын алу және болдырмау мақсатында кезекшілік ұйымдастырылуда, – дейді аудандық тұрғын үй коммуналдық шаруашылығы бөлімінің басшысы Алмас Абдуллаев. 

Коммуналдық қызметтер толықтай күшейтілген режимде жұмыс істеп, қар тазалау үшін 10-нан аса техника бөлінген. Арнайы техникалар көшелерді механикалық тазартумен қатар, жол бойлары, жаяу жүргіншілер жолдарын қардан тазалау үшін қол жұмыстары да қатар атқарылуда. 

- Жалпы ауданда атқарылған жұмыстар аз емес, «Ауыл – ел бесігі», «Өңірлерді дамыту» тағы басқа да мемлекеттік жобалар мен бағдарламалар аясында көп жұмыс атқарылды. Жолдар жөнделді, таза ауыз су кіргізіліп, ел көгілдір отынның да игілігін көруде. Көшелер жарықтандырылып, әлеуметтік нысандар көптеп салынуда. Сондай-ақ қазіргі кезде аудан тұрғындарымен жиі кездесіп, оларды мазалаған мәселелердің шешілуіне ықпал етіп келемін.  Бұл өз кезегінде елді мекендердегі мәселелердің қордаланбауына, кез келген түйткілдің түйінін дер кезінде тарқатуға септігін тигізуде. Мәселен соңғы өткізген қабылдауда аудан орталығы Абай ауылы мен Қошқарата ауылдық келген азаматтар кәсіпкерлік, инфрақұрылым, денсаулық салаларына қатысты мәселелерді қозғап, елді мекендерді абаттандыру бойынша ұсыныстарын айтты. Қоғамдық қабылдауда көтерілген түйткілдердің бірқатары сол мезетте-ақ шешімін тапса, бір бөлігі рет-ретімен зерделеніп, заң шеңберінде қаралатын болады. Тұрғындар көтерген мәселелер тұрақты бақылауымызда, - дейді аудан әкімі Жәнібек Ағыбаев.