Түркістан облысының Ордабасы ауданында тағы бір елдімекен жаңа жыл қарсаңында газ құбырына қосылды. Мемлекет басшысы Қасым-Жомарт Тоқаев Жолдауында «Экономикалық саясатымыздың негізгі мақсаты еш өзгермейді. 

Оның мәні – сапалылық және инклюзивтік тұрғыдан халықтың әл-ауқатын арттыру» деп, алдағы бағытымызды айқындап берген болатын. Яғни, жаңа экономикалық бағдарымыздың басты басымдықтарының бірі – халықтың жайлылығын қамтамасыз ету. Соның бірі осы, яғни халықты кедергісіз көгілдір отынмен қамту. 

Ордабасы ауданының әкімі Азат Оралбаевтың айтуынша, Шұбар елді мекеніндегі 600-ден аса абонентке газ жеткізілген.

- Жалпы елімізде газ өндіру тәуелсіздік жылдарында 8-ден 52 миллиард текшеметрге дейін артты. Президентіміз өзінің халыққа арнаған Жолдауларында бұл іс әрі қарайда өсе түсетіндігін алға тартып отыр. Жалпы, биыл ауданымыздағы газдандыру жұмысы 61,4 пайызды құрап, жаңа газ құбыры тартылған елдімекендермен ауданда табиғи газбен қамтылу көрсеткішін арта түспек. Жалпы, газдандыру жұмыстарын ауданымызда  мердігерлікке берілген мекемелер кезең-кезеңімен жүзеге асырып, Президент тапсырғандай 2025 жылға дейін толық аяқтау жоспарлануда. Бұл бағыттағы құрылыс жұмыстары облыс басшылығының тұрақты бақылауына алынған. Ал табиғи газ жеткізілген абоненттерді көгілдір отынмен қамтуды жергілікті жердегі «QazaqGaz Aimaq» акционерлік қоғамына қарасты газ шаруашылықтары атқаруда, - дейді аудан әкімі.   

Азат Оралбаевтың айтуынша,аудандағы 57 елді мекеннің табиғи газбен қамту деңгейі 61,4 пайызды құрап отыр. Жалпы көгілдір отынмен қамтылған елдімекен саны 35. Сонымен қатар,  Шұбарсу елді мекенін табиғи газбен қамту құрылысы 4 кезеңмен іске асырылуда. 3 нысанның құрылысы аяқталса, 4-ші нысан құрылысын 2025 жылы аяқтау көзделген. Сонымен Шұбар елді мекеніне газ құбырын жүргізу құрылыс жұмысын «Компания ГазСтрой» жауапкершілігі шектеулі серіктестігі жүргізген. Компания тарапынан 2021 жылы бастаған жоба биылғы желтоқсан айында аяқталып, жалпы ұзындығы 38,336 шақырымды құрайтын құбыр арқылы 621 үйге газ жеткізілді. Тұрғындардың қуанышын бөлісуге Түркістан облысы әкімінің бірінші орынбасары Зұлпыхар Жолдасов арнайы келген болатын.  

– Мемлекеттік бағдарламалардың арқасында ауылдарымызда да қаладағыдай жағдай жасалуда. Өздеріңіз жақсы білесіздер, Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында елімізде мұнай-газ-химия саласын одан әрі дамыту – маңызды міндет екенін атап өтті. «Орта Азия – Орталық» магистральді газ құбырының елімізге тиесілі 800 шақырымнан астам бөлігін жаңғырту жұмысы өте қысқа мерзімде аяқталды. Газ тасымалдау бағдарларын әртараптандыру және оның қуатын арттыру қажет. Тұрғындарды және экономиканы газбен қамтамасыз ету – Үкіметтің басты міндетінің бірі. Былтыр бірқатар газ кеніші игеріле бастады. Сондай-ақ жылына жалпы көлемі бір миллиард текше метр газ өндіретін жаңа кен орындарын игеру жоспарланып отыр. Әзірге бұл жобалар толық іске қосылған жоқ. Сондықтан газды ішкі нарыққа тиімді бөлу қажет. Жылу электр орталықтарын және қарапайым тұтынушыларды көмір орнына газ жағуға көшіру жұмысын байыппен жүзеге асырған жөн», - дейді Президент.

Мемлекет басшысының мұны айтып отырғандағы себебі, бүгінгі күні экологиялық мәселелер өте маңызды. 

Мысалы, газға көшу тек Астананың өзінде зиянды қалдықтардың ауаға таралуын алты есеге немесе жылына 35 мың тоннаға азайтады. Осының өзінен Түркістан қаласы мен аудандарымыздың экологиясына қандай үлес қосатынын аңғару қиын емес. Шындығына келсек, соңғы жылдары климаттың күрт өзгергенін байқауға болады. Оның себебі, табиғатқа антропогендік жағдайлар әсер етіп жатыр. Табиғи газ – бұл көмір сутектерден тұратын ең экологиялық таза отын. Ал, Қазақстанды газдандыру жұмыстары, соның ішінде жаһандық экологиялық проблемаларды шешуге де оң септігін тигізбек. Сондықтан, Президенттің бастамалары біз үшін тікелей көрсеткіш қана емес, сонымен бірге ондаған жылдарға арналған жаһандық жоспар болып табылады. Алда ауылдағы тұрғындар қатты отын тұтынудан арылып, таза, табиғи газ тұтынады. Осы орайда баршаңызды газ құрылысының іске қосылуымен құттықтаймын, – деді облыс әкімінің бірінші орынбасары- дейді облыс әкімінің бірінші орынбасары Зұлпыхар Жолдасов. 

Салтанатты  шарада облыс әкімінің бірінші орынбасары, аудан басшысы, ауыл ақсақалдары, халық қалаулылары көгілдір отынның алауын жағып ауыл тұрғындарының қуанышын бөлісті.