Мемлекет басшысы Қасым-Жомарт Тоқаев халыққа арнаған Жолдауларында медицина саласының дамуына ерекше көңіл бөліп келеді. Шынын айту керек, соңғы жылдары медицина саласында жеткен жетістік те, табыс та мол.

Түркістан облысындағы медициналық пункттер мен дәрігерлік амбулаториялар жаңартылды. Ауруханалар мен емханалар қатары да көбейе түскен. Ал заманауи құрал-жабдықтармен жабдықталмаған бірде-бір медициналық нысан жоқтың қасы. Олар арнайы автокөлікпен де қамтылып жатыр. Соның бірі Талапты ауылдық округіне қарасты Шытты ауылында орналасқан фельдшерлік-акушерлік тірек пункіті. 

Отырар ауданының әкімі Қайрат Жолдыбайұлының айтуынша, аудандағы барлық елдімекенде медициналық нысандар бар. Ескі медициналық фельдшерлік-акушерлік тірек пункіттері заман талабына сай қайта салынып, заманауи құрал жабдықтармен жабдықталуда. Соның қатарында биыл пайдалануға берілген осы Шытты ауылында орналасқан фельдшерлік-акушерлік тірек пункіті де бар болып шықты. 

– Кез келген мемлекет ел азаматтарының денсаулығын сақтауды, әл-ауқатын арттыруды бірінші кезекке қояды. Бұл ретте Президентіміз Қасым-Жомарт Тоқаевтың алдымызға қойған міндеттеріне сәйкес аурудың алдын алуға, медициналық қызметтің қолжетімді әрі сапалы болуын қамтамасыз етуге барлық жағдай жасалуда. Биыл «Ауылдық денсаулық сақтауды жаңғырту» жобасы аясында бірнеше медициналық-санитарлық нысанның құрылысы басталып, оның бірі ел игілігіне тапсырылды. Аталған жоба шеңберінде Шытты фельдшерлік-акушерлік тірек пункіті қайта жаңғыртылды. Сондай-ақ мұндай жұмыстар шет ауылдық округтерінде де жоспарға сәйкес атқарылуда. Айта кету керек, Шытты ауылында 1300-ден астам тұрғын бар. Ауыл тұрғындары бұрындары басы ауырып, балтыры сыздаған кезде аудан орталығына, Шәуілдір ауылына барған. Енді тұрғындар үшін жаңа медициналық тіректе мамандар қызмет көрсететін болады.

Ауданымызда жаңадан ашылған бұл медициналық нысан халқымыздың әлеуметтік жағдайын жақсартуға бағытталған нақты қадамдардың бірі. Бұл нысан ауыл тұрғындарының денсаулығын нығайтып, медициналық қызметтің қолжетімділігін арттыруға септігін тигізеді. Мемлекетіміздің ең басты байлығы – адам. Сондықтан әр азаматтың денсаулығы мен өмір сапасын жақсарту – басты міндетіміз. Осы тіректің ашылуы арқылы ауыл тұрғындары сапалы медициналық көмек ала алады. Мұнда алғашқы медициналық көмек көрсетуге арналған барлық жағдай жасалған. Сондай-ақ кәсіби мамандардың қызметі де ауыл тұрғындарына қолжетімді бола түспек, - деді аудан басшысы Қайрат Жолдыбайұлы.