Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өрлеу, қоғамдық оптимизм» атты Жолдауында елде газ тапшылығын жоюды тапсырды.

«Газ тасымалдау бағдарларын әртараптандыру және оның қуатын арттыру қажет. Тұрғындарды және экономиканы газбен қамтамасыз ету – Үкіметтің басты міндетінің бірі» деп атап өтті Президент. Сондай-ақ газды ішкі нарыққа тиімді бөлу қажет екенін тапсырды. Бүгінгі күні Түркістан облысы ғана емес, еліміздің барлық өңірінде жанармай құятын бекеттерде газ жетіспей жатқаны бірнеше айдан бері белгілі. Батыс облыстарда және елдің оңтүстігі мен солтүстігінде машинасы газбен жүретін азаматтар сағаттап кезекте тұруға мәжбүр. Кей жанармай бекеті отынды талонмен сатса, кейбірі қосымша тауар қосып беріп жатыр, ал кейбірі жұмыс істемей тұр.

Бұл жайдан билікте хабардар. Мәселен энергетика министрі Алмасадам Сәтқалиев журналистерге берген сұхбатында елде сұйытылған мұнай газ тапшылығы жоқ дейді. Оның айтуынша жергілікті әкімдіктер оны кейбір бекетке таратпай отырған көрінеді. «Әкімдіктер ай сайын шамамен 160–170 мың тонна тапсырыс береді. Оның 130–140 мың тоннасы жоспар бойынша жеткізіледі. Қалған бөлігін резервтен аламыз. Кей өңірде тұтыну мөлшері артқаны байқалып отыр. Біз бұған газбен жүретін машина көбейгені себеп болды деп санаймыз. Министрлiк газдың көп бөлігі мұнай-химия саласына бөлiнетiнiн ескертсе де, олар автогаздан бас тартпай отыр» деп келтірді минирстр. Бұл мәселе Ордабасы ауданында да бар. Оны шешу жолдары ауданда бақылауға алынған. 

Ордабасы ауданының әкімі Азат Оралбаевтың айтуынша, аудан аумағында 33 авто газ құю бекеті бар. Оның 12-де ғана сұйытылған газ өнімі сатылуда, арнайы газ құю станциясы жоқ. 

-Президентіміз Жолдауда газ тапшылығын жоюды тапсырды. Елді мекендерді табиғи отынмен қамту жоспарлы жүргізілуде. Ал сұйытылған газ өніміне келер болсақ, жанармай бекеттерінде газ тапшылық бар, сондай-ақ жеке тұрмыстық газ баллондарға газ құюда әрдайым мәселе орын алып отыр. Ол өнімнің тапшылығы және тұрмыстық баллондарға автогаз бекеттері өнімді тұрақты босатпауы. Осыған байланысты қадамдық іс-шара жоспарын бекітіп, әлеуметтік газдың берілуін қамтамасыз етуді тапсырылды. Бұл шаруа менің тікелей бақылауымда, - дейді аудан басшысы. 

Тұрмыстық баллондарды газ толтыру пункттерінде ғана емес, сонымен қатар барлық қажетті қауіпсіздік талаптарын сақтау үшін тұрмыстық баллондарға және жабдыққа құю үшін тиісті инфрақұрылымы бар газ толтыру станцияларында құюға рұқсат етіледі. ҚР Энергетика министрлігі тұрмыстық баллондарды жаңарту (ескі баллондарды жаңасына ауыстыру) мақсатында мүдделі мемлекеттік органдармен бірлесіп тұрмыстық баллондарды сәйкестендіру мен есепке алудың бірыңғай тәсілін енгізу жөніндегі жұмыс тобы ауданда да құрылған. Қазақстанда тұрмыстық баллондардың жеке өндірісі жоқ. Бұл өнім негізінен жақын және алыс шетелдерден импортталады.

Арнайы жабдықталған автокөліктер қызметін жандандыруына қатысты Түркістан облысы әкімдігінің ақпаратына сәйкес, бүгінгі таңда облыстағы 807 елді мекеннің (2 млн 142 мың тұрғын) 510 елді мекені (63,2 %) немесе 1 746 мың тұрғын (81,5 %) табиғи газды қосуға мүмкіндік алды. Жалпы облыстағы 17 ауданның  4 ауданында (Түркістан 100 %, Төлеби 100 %, Түлкібас 94,9 %, Сайрам 92,9 %) газбен қамтылу деңгейі 90 пайыздан жоғары. 

Бұдан басқа, газ толтыру пункттері Арыс, Қентау қалаларында орналасқан. Қалған аудандарда сұйытылған мұнай газымен айналысатын субъектілер арасында газ толтыру пункттерін салу жөніндегі келіссөздер жүргізіліп жатыр. Мүдделі мемлекеттік органдармен тиісті ұйымдастыру шараларының жоспары әзірленді және ағымдағы жылдың соңына дейін қабылданады. Тұтастай алғанда, газдандыру мәселесі Үкімет пен жергілікті атқарушы органдардың бақылауында.