Бәйдібек ауданына қарасты Алғабас ауылдық округінің орталығы Шақпақ елді мекеніне табиғи газ берілді. Бұл ауыл тұрғындарының көп жылдан күткен қуанышы болатын. 

Бәйдібек ауданының әкімі Ерлан Нұрмахановтың айтуынша, биыл ауданда 8 елді мекенге табиғи газ берілген. Соның бірі осы Шақпақ ауылы. 

- Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында елімізде мұнай-газ-химия саласын одан әрі дамыту – маңызды міндет екенін атап өтті. «Орта Азия – Орталық» магистральді газ құбырының елімізге тиесілі 800 шақырымнан астам бөлігін жаңғырту жұмысы өте қысқа мерзімде аяқталды. Газ тасымалдау бағдарларын әртараптандыру және оның қуатын арттыру қажет. Тұрғындарды және экономиканы газбен қамтамасыз ету – Үкіметтің басты міндетінің бірі. Былтыр бірқатар газ кеніші игеріле бастады. Сондай-ақ жылына жалпы көлемі бір миллиард текше метр газ өндіретін жаңа кен орындарын игеру жоспарланып отыр. Әзірге бұл жобалар толық іске қосылған жоқ. Сондықтан газды ішкі нарыққа тиімді бөлу қажет. Жылу электр орталықтарын және қарапайым тұтынушыларды көмір орнына газ жағуға көшіру жұмысын байыппен жүзеге асырған жөн», - дейді Президент халыққа арнаған Жолдауында. Бұл бағытта ауданымызда көптеген ауқымды істер қолға алынып, түрлі нысандардың құрылысы жүргізіліп ел игілігіне пайдалануға беріліп жатыр. Соның бірі Бәйдібек ауданы Шақпақ елді мекенінде жүзеге асырылған көгілдір отын тарту жобасы. Бұл жобаның аяқталғанына, баспаналарын жаңа жыл қарсаңында табиғи газбен жылытып отырған ауыл тұрғындарының қуанышында шек жоқ, – деді аудан басшысы.

Шақпақ елді мекенін табиғи газбен қамту мақсатында «Жарқын - Б» жауапкершілігі шектеулі серіктестігі 16,625 шақырымға газ желісінің құбырлары жүргізілген. Бүгінгі таңда серіктестік құрылыс жұмыстарын аяқтап, 427 тұрғын үйді көгілдір отынға қосқан. 

Президент тапсырмасы елімізде «QazaqGaz Aimaq» акционерлік қоғам тарапынан талапқа сай орындалуда. «QazaqGaz Aimaq» акционерлік қоғамының Түркістан өндірістік филиалы өкілдерінің айтуынша, «QazaqGaz Aimaq» акционерлік қоғамы 11,5 миллионнан астам тұрғынды үздіксіз газбен қамтамасыз ететін Қазақстан Республикасындағы тауарлық газдың ірі жеткізушісі болып табылады. Сондай-ақ елімізде 69 мың километрді құрайтын газ тарату желілері бар екен. Бүгінгі күні «QazaqGaz Aimaq» акционерлік қоғамына қарасты өңірдегі өндірістік филиал облыс тұрғындарына табиғи газдың кедергісіз жеткізілуін қамтамасыз етіп отыр.

– Мемлекет басшысы Қасым-Жомарт Тоқаев Жолдауында «Экономикалық саясатымыздың негізгі мақсаты еш өзгермейді. Оның мәні – сапалылық және инклюзивтік тұрғыдан халықтың әл-ауқатын арттыру» деп, алдағы бағытымызды айқындап берген болатын. Яғни, жаңа экономикалық бағдарымыздың басты басымдықтарының бірі – халықтың жайлылығын қамтамасыз ету. Соның бірі осы, яғни халықты кедергісіз көгілдір отынмен қамту. Жалпы елімізде газ өндіру тәуелсіздік жылдарында 8-ден 52 миллиард текшеметрге дейін артты. Президентіміз өзінің халыққа арнаған Жолдауларында бұл іс әрі қарайда өсе түсетіндігін алға тартып отыр. Атап айтар болсақ, ағымдағы жылы ауданда 8 елді мекенге табиғи газ берілсе, жыл соңына дейін 7 елді мекенді газға қосу жоспарлануда. Бір елді мекеннің ішкі газ жүйелерінің құрылысы 2025 жылға өтпелі, - дейді аудан басшысы Ерлан Нұрмаханов.

Бұдан бөлек, 2 елді мекенді табиғи газбен қамтамасыз ету жұмыстарына жоба әзірленіп, жоғары тұрған бюджеттен қаржыландыруға өтінімдері ұсынылса, 8 елді мекенге жеткізуші және ішкі газ тораптарының құрылысына жобалау-сметалық құжаттамалары әзірленуде. Сондай-ақ тауарлық газды тұтынушылар саны жылдан жылға артып келеді. Осы жылдың 10 айы мен өткен жылдың сәйкес кезеңімен салыстырғанда жеке абоненттер саны да 500-ге көбейген.

– Бүгінгі күні экологиялық мәселелер өте маңызды екені белгілі. Мысалы, газға көшу тек Астананың өзінде зиянды қалдықтардың ауаға таралуын алты есеге немесе жылына 35 мың тоннаға азайтады. Осының өзінен аудандарымыздың экологиясына қандай үлес қосатынын аңғару қиын емес. Шындығына келсек, соңғы жылдары климаттың күрт өзгергенін байқауға болады. Оның себебі, табиғатқа антропогендік жағдайлар әсер етіп жатыр. Табиғи газ – бұл көмір сутектерден тұратын ең экологиялық таза отын. Ал, Қазақстанды газдандыру жұмыстары, соның ішінде жаһандық экологиялық проблемаларды шешуге де оң септігін тигізбек. Сондықтан, Президенттің бастамалары біз үшін тікелей көрсеткіш қана емес, сонымен бірге ондаған жылдарға арналған жаһандық жоспар болып табылады. 

Жалпы, газдандыру жұмыстары ауданымызда мердігерлікке берілген мекемелер кезең-кезеңімен жүзеге асырып, Президент тапсырғандай 2025 жылға дейін толық аяқтау жоспарлануда. Бұл бағыттағы құрылыс жұмыстары облыс басшылығының тұрақты бақылауына алынған. Ал табиғи газ жеткізілген абоненттерді одан ары көгілдір отынмен қамту біздің міндетіміз. Алдағы жылдары қалған 8 елдімекенге табиғи газ кіргізілгелі отыр, - дейді аудан әкімі Ерлан Нұрмаханов.