Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында агроөнеркәсіп кешеніне инвестиция тарту – өте маңызды міндет екенін, шаруаларға субсидия беру, қаржыландыра отырып ауыл шаруашылығын көтеру керектігін айтты. 

Бүгінгі күні аймақтың ауыл шаруашылығы мен өнеркәсіп саласына инвестиция салуға ниет танытқан отандық және шетелдік компаниялардың қатары қалың. Жалпы бүгінгі таңда облысымызда барлық салада өсім динамикасы қалыптасып отыр. 

Түркістан облысының әкімі Дархан Сатыбалдының айтуынша, Түркістан облысы Қытай Халық Республикасының бизнес өңірлерімен екіжақты өңіраралық қарым қатынасты нығайту бағытында әріптестік байланыс орнатқан. Осы әріптестіктің аясында облыс орталығында өткен Халықаралық форумда 300 миллиард теңгенің келісіміне қол қойылды. Нәтижесінде, өңірде дрон және видеокамера, медициналық жиhаз, тұрмыстық химиялық өнімдер, құрылыс материалдарын, тамақ өнімдерін шығару және басқа да тауарлар өндіретін кәсіпорындарды ашу жұмыстары жүзеге асырылуда.

- Мемлекет басшысы Қасым-Жомарт Тоқаев биылғы Жолдауында шетелдік және отандық инвесторлар тарта отырып, өңірдің әлеуметтік-экономикалық дамуын қалыптастыруды тапсырған болатын. Президент тапсырған міндеттер облысымызда жоспарлы түрде жүзеге асырылу үстінде. Шағын және орта кәсіпкерліктің де көзін тауып, байланыстырып отыр. Инвесторлар ең алдымен аймақтың экономикалық әлеуетін көтеруге елеулі үлес қосатыны белгілі. Осының аясында облысымызда инвесторлар тарапынан көптеген жобалар іске асырылуда. Атап айтар болсақ, сиырдың сүйегінен сан түрлі өнім шығаратын өндірістік кешенді Түркістан облысындағы индустриалды аймақта салу жоспарлануда. Бірегей жоба пайдаланылмаған мүйізді ірі қара малдың сүйектерін озық биотехнологиялардың көмегімен экономикалық құндылығы жоғары өнімдерге қайта өңдеуге бағытталған. 

Жоба мал қалдықтарын тиімді пайдалануға мүмкіндік беріп қана қоймай, аймақ үшін экономикалық өсудің жаңа көзін қамтамасыз етпек. Жаңа өндіріс орнының іске қосылуы өңір халқының әл ауқатын жақсарта түспек. Ең бастысы – жаңа жұмыс орындары ашылады, - дейді аймақ басшысы. 

Мемлекет басшысының тапсырмасы бойынша елімізде іске асырылып жатқан барлық инвестициялық жобалардың бірыңғай пулы қалыптастырылған. Қазақстан мен Қытай Халық Республикасы арасындағы достық, Ұлы Жібек жолы құрылғаннан бері дамып келе жатқан екі ел арасындағы сауда-экономикалық қарым-қатынастың өркендеуіне ықпал етеді. 

Келіссөз барысында Дархан Сатыбалды шетелдік инвесторларға аймақтың экономикалық даму перспективаларын таныстыра отырып, облыстың бүгінгі инвестициялық мүмкіндіктеріне кеңінен тоқталды. Сондай-ақ облыс басшысы өңірдегі қолайлы бизнес-климатты ерекше атап өтті. Аймақта инвесторлардың жұмысын жеңілдету үшін барлық қажетті жағдай жасалғанын жеткізді. 

– Мемлекет басшысының екі ел арасындағы серіктестікті жаңа деңгейге көтеріп, Қытайдың «Бір белдеу, бір жол» мегажобасын толығымен қолдайтыны белгілі. Тарихы терең, болашағы зор Түркістан өңірінде кәсіп ашу – ұтымды шешім. Бүгінгі мақсатымыз – тұрғындардың әл-ауқатын арттыру, өңір экономикасын жаңа деңгейге көтеру. Ауыл шаруашылығы саласы Түркістан облысы экономикасының негізгі драйвері болып саналады. Осы саланы дамытуда бірлескен жобаларды жүзеге асыруға дайынбыз, - деді Дархан Амангелдіұлы.  

Сондай-ақ Түркиялық инвесторлар да Түркістанда өз бизнестеріз жүргізуге ниет танытып отыр. Олар мұз ерітуге арналған түйіршік шығаратын кәсіпорын ашпақ. Түркиялық «KAR-TEM» компаниясының директоры Исмаил Сонмездің айтуынша, «KAR-TEM» компаниясы жоғары деңгейдегі гибридті кристалға негізделген түйіршіктерді өндіреді. Бұл түйіршіктер кальций және магний хлоридімен байытылған және өте төмен температурада, яғни -30°C-тан -40°C-қа дейін мұзды тез еріту қасиетіне ие. Экологиялық таза және экономикалық тұрғыдан тиімді болып табылатын бұл өнімдер қыста жолдарды, алаңдарды, аяқжолдарды және басқа да инфрақұрылымдарды қауіпсіз әрі жылдам тазартуға мүмкіндік береді.

Жобаның жалпы инвестиция көлемі 5 миллион АҚШ долларын құрайды. Жаңа кәсіпорынды 2025 жылы іске қосу жоспарланып отыр. Жоба іске қосылғанда 300-ге жуық жаңа жұмыс орнын ашу көзделген.