«Таза Қазақстан» акциясы Сайрам ауданында жалғасын табуда. Президеніміз Қасым-Жомарт Тоқаев биылғы Жолдауында елімізде көктемнен бері «Таза Қазақстан» жалпыұлттық экологиялық акциясы жүріп жатқанын, ол бұл – тұтас халықты ұйыстырған берекелі бастама екенін айтқан еді. «Халқымыздың бойында жақсы қасиеттер өте көп. 

Мысалы, өзге елдер бізді қонақжай, ақкөңіл халық ретінде біледі. Дәл солай тазалық жұртымыздың қанына, жанына сіңген қасиет болуы керек. «Таза Қазақстанның» аймақтарда сапалы жүзеге асуына әкімдер тікелей жауапты. Олар жұртқа істің мән-маңызын түсіндіріп, жұмысты дұрыс үйлестіруге міндетті» деген болатын Президент. Міне бұл жұмыс Сайрам ауданында талапқа сай жүргізілуде. 

Кеше аудан әкімі Арман Сәбитовтің төрағалығымен өткен кезекті аппараттық мәжілісте Президент тапсырған «Таза Қазақстан» акциясының ауданда жүргізілу барысы қаралды. Оған аудан әкімінің орынбасарлары, аппарат басшысы, бөлім басшылары, бірқатар мекеме басшылары мен ауылдық округ әкімдері қатысты. Жиын барысында «Көрікті Сайрам» мекемесінің басшысы Бақытқали Жаңабаев «Таза Қазақстан» акциясы барысында атқарылған жұмыс барысымен таныстырды. Оның айтуынша, «Таза Қазақстан» республикалық экологиялық акциясы аясында «Көшет егу күні» тақырыбында жалпыаудандық сенбілік ұйымдастырылған. 

- Президент Жолдауында тапсырылған «Таза Қазақстан» акциясы аясында ұйымдастырылған «Көшет егу күні» атты жалпыаудандық сенбілікке аудан ардагерлері, аудандық мәслихаттың төрағасы және «Аманат» партиясы Сайрам аудандық филиалының атқарушы хатшысы, ауданға қарасты мемлекеттік және бюджеттік мекеме басшылары мен мамандары, білім беру ұйымдары белсене қатысты. Сенбілік барысында «Бадам орман және жануарлар әлемін қорғау жөніндегі мемлекеттік мекемесі»-нен алынған 12900 түп көшет аудан орталығындағы «Мәртөбе» алаңына және барлық ауылдық округ аумағындағы мектеп аулаларына отырғызылды. Бұдан бөлек, «Көшет егу күнінде» білім саласы қызметкерлері өздеріне бекітілген аумақтарды қураған ағаш бұталары мен жапырақтардан тазартып, абаттандыру жұмыстарын жүргізді, - дейді «Көрікті Сайрам» мекемесінің басшысы Бақытқали Жаңабаев.

Аудан әкімі Арман Сәбитов «Көрікті Сайрам» мекемесінің жұмыс барысын бақылай отырып, алдағы уақытта аудан аумағындағы тазалық, көріктендіру, абаттандыру және көше жарықшамдары мәселесін шешуге көңіл бөлуді тапсырды. Сондай-ақ жиын барысында ауданның тазалығын қамтамасыз ету және ауылдардың көрінісі мен экологиялық жағдайын жақсарту және қоғамдық орындарды абаттандыру мәселелері қарастырылды. 

«Тазалық – баршаға ортақ. Президент тапсырған «Таза Қазақстан» акциясы аясында ауданда көп жұмыс атқарылып жатыр. Қоршаған ортаны көгалдандырумен қатар, ауданның экологиялық ахуалын жақсартуға да зор үлес қосатын бұл шара алдағы уақытта да өз жалғасын табатын болады», - дей келіп, аудан әкімі көшелердегі жарық шамдарының тұрақты жұмыс істеуі, әсіресе түнгі уақытта тұрғындардың қауіпсіздігі үшін маңызды болып табылатындығын айтты. Осыған байланысты, аудан басшысы мекемеге жарықтандыру жүйесін тиімді басқару қажеттігін тапсырды. Сонымен қатар, аудан тұрғындарының талаптары мен ұсыныстарын ескере отырып, мекемеге нақты жұмыстар жүргізуді жүктеді. 

Сондай-ақ, Сайрам ауданы әкімі аппаратының ұйымдастыру-инспекторлық, ақпараттандыру және мемлекеттік қызмет көрсету мониторингі бөлімшесінің басшысы Жасұлан Саутбек облыс және аудан әкімінің хаттамалық тапсырмаларының орындалу барысы туралы баяндама жасады. Аудан әкімі хаттамалық тапсырмалардың уақытылы әрі сапалы орындалуы керектігін, бұл мақсатта әр бөлім мен мекеменің жауапкершілігін арттыру қажеттігін жеткізді. Тапсырмаларды орындау барысында туындаған мәселелер мен оларды шешу жолдары туралы да ұсыныстар айтылды. 

Жиын қорытындысында абаттандыру шарасы аясында аудан әкімі Арман Сәбитұлы тиісті сала басшыларына жасыл желекті суару жүйесінің тұрақты жұмыс істеп тұруын қадағалауды тапсырды.