Шымкенттік көрермен «Қыз Жібек» операсының премьерасын тамашалады. Тәуелсіздіктің 30 жылдығына орай ұлттық алтын қордағы асыл мұрамыз саналатын Евгений Брусиловскийдің «Қыз Жібек» операсы қалалық опера  және балет театрының сахнасында қойылды.

Төлеген мен Жібектің қайғылы махаббаты бейнеленген операның либреттосын әдебиетіміздің классигі Ғабит Мүсірепов қағазға түсірсе, музыкасын Евгений Брусиловский жазды. Бұл туындыда композитор халық әндері мен күйлерін шебер өрнектей білген. Ұлттық өнеріміздің алтын қорына енген 2 актілі 4 көріністі опера Шымкентте 2010 жылы А.Алтынбековтың режиссерлігімен сахналанған болатын.  Жаңаша жарық көрген көрнекті шығарманың қоюшы режиссері – Михаил Панджавидзе. Қойылымның музыкалық жетекшісі және қоюшы дирижері – Қазақстанның еңбек сіңірген қайраткері Абзал Мұхитдинов. Ал көркемдік жетекші – Майра Мұхамедқызы. 

Сахнада ару Жібекті сомдаған Түркістан музыкалық драма театрының вокал әртісі Әйкерім Шәріпбек және театрдың жас солисі халықаралық байқаулардың лауреаты Жұлдызай Мұсаева - Жібектің бойындағы нәзіктік, сабырлылық, биязылық т.б. сезімдерінің шынайылығын халық алдында көрсетті. Жібектің Төлегені болып Шымкент қалалық опера және балет театрының көркемдік жетекшісі Мәдіхан Дүйсеев өзінің ән орындау шеберлігімен көрермен көңілінен орын тапты.

Нағыз махаббат хикаясын көрермендер 86 жылдан бері үлкен сахнада тамашалап келе жатқанын атап өткен жөн. Бірақ бұл жолы режиссура мен сценографияда көрсетілген өзгешеліктерге байланысты опера жаңаша шырқалды.