Отандық әнші, актриса Жанар Айжанова 27 жыл бұрын жолдасымен отау құрған сәтін жариялады, деп хабарлайды Oinet.kz тілшісі.

"Бұл осыдан 27 жыл бұрын менің қожалардың әулетіне келін болып түскен оқиғам. Марқұм Адайбек тойдан кейін көп ұзамай жол апатынан қайтыс болып кетті. Екеуміз де 27 жаста болатынбыз. Менің тағдырым со кезден басталды. Көзімді жұмып қанша рет дария кештім десейші. Аяғым ауыр, елде тоқырау, әркім өз басымен қайғы болып кеткен кез. Сүйенерім де, сенгенім де бір Алла. Жыртық үйдің құдайы бар демекші, тырмысып жүріп, қанаттыға қақтырмай қызымды да өсірдім. 

Айжұлдыздың өз әкесі кім деп әлі күнге дейін сұрайды елдер. Папасы жігіттің сұлтаны, бір сөзді, мысы басым, қолы ашық, сымбатты нағыз ер жүрек батыр дер едім. Алланың жазғаны сол болды, ерте кетті. Осыдан екі жыл бұрын елге қызым екеуміз арнайы барып, Айжұлдызды әжесіне, бауырларына апарып, ас беріп, басына құран оқып келеміз деп отырғанда карантинге тап болдық. Соның реті биыл келді. Айжұлдыз папасының басына барып, өзі құранын оқып, әжесіне сәлем беріп, бауырларымен қыдырып, үлкен іс бітіріп келдік. Әжесі де жасы 87-ге келсе де, май айында Сылдырмақтың тұсау кесер тойына арнайы келіп, батасын беріп кетті. Алшақтап бара жатқан арамызды апам өзі келіп, қайта жалғап кетті. 

Бүгін мына видеоны интернеттен тауып алдым деп Қарағандыдан бір танысым уатсапқа жіберіпті. Содан өткен 27 жылға ойша саяхат жасап, көз алдыма кино сияқты небір дүниелер келіп, біраз толқыдым. Ақыры интернетте жүр екен, менің де лентамда тұрсын деп қойдым. Дей келе жас отау құрып жатқан жастарымыз топырақтан тысқары болып, бір жастықта қартайсын деп тілеймін", - деп жазған Айжанова instagram парақшасында.

Посмотреть эту публикацию в Instagram

Публикация от Zhanar_Aizhanova (@zhanar_aizhanova)