Бүгінгі таң қайғылы жаңалықпен басталды. Белгілі тележүргізуші, қиыншылықтан шығар жол таппай келген барша жандарға көмектесуге дайын тұратын нар тұлға Бейсен Құранбек дүниеден озды. Небәрі 49 жыл ғұмыр кешкенімен артынан ойып аларлық із қалдыра білді. Ауыр дертке шалдыққалы желіде көпшілікті өзінің жағдайынан хабардар етіп отырған журналист өткен жылдың желтоқсан айында белсенділігін тоқтатқан. 

Бейсен Құранбек Facebook желісіндегі соңғы жазбасын тоғызыншы желтоқсанда өз туған күнінде жариялаған. Бұл жазбада тележүргізуші өмірге қатысты ой-толғауымен бөліскен. 

"Білу - бөлек , түсіну - басқа. Жыл басынан бергі ішкі арпалысқа толы күндерімде, ұйқысыз түндерімде үш нәрсені тереңірек түсіндім. Бірінші. Ұстазым жиі айтатын "бұл өмірде ақшадан да, биліктен де құдіретті дүние бар. Ол- ниеттің, тілектің, батаның күші" деген сөздің рас екенін. Екінші. Халқымыздың "басты байлық - денсаулық" деп бір ауыз сөзбен айта салған даналығына бас идім. Ұйқы тыныш, тәбетің жақсы боп, ертеңгісін еш жерің ауырмай оянудың өзі жарты бақыт екенін ұқтым. Үшіншіден, бабаларымыз қалдырған "Байлық - қолға ұстаған мұз, Бақыт - басқа қонған құс, Бала - артта қалар із, бұл өмірдің қызығы - Сіз бен Біз" деген сөзінің тұтас өмірлік философия екенін, өмірдің мәні де, сәні де сыйластықта екенін әр клеткаммен сезіндім. Менің ешқандай "заслугам" жоқ туған күнімде ақжарма тілегін ақтарған баршаңызға мың қайтара алғыс айта отырып, бір-біріміздің тілеуімізді тілеп, денсаулықтың қадірін біліп, бір-бірімізді шын көңілмен құрметтей білейікші дегім келеді. Бар болыңыздар" , - деп жазды ол.