Қанат Айтбаев ұлы Димашты қырғыз дегендерге ренішін білдірді

Oinet.kz 06-02-2021

Кешелі бері әлеуметтік желіде әнші Димаш Құдайбергенді "қырғыз" деген жазбалар қаптап жүр. Осыған байланысты әншінің әкесі Қанат Айтбаев пікір білдірді деп хабарлайды Oinet.kz тілшісі.

Screenshot_4.jpg

Қанат Айтбаев әлеуметтік желідегі парақшасында өзінің ата-тегіне тоқталып өтті. 

- Әжем Рахиманың руы Әлімнің ішіндегі — Жақайым, оның ішінде - Быламық. Ол кісі бойжетіп, Жақайым руының ішіндегі Талпақ, Қырғыз руының жиені Төлеубай деген кісіге тұрмысқа шығады. Екеуі бірнеше бала сүйеді. Сөйтіп жүргенде отызыншы жылдардың аласапыраны басталады. Аштықтың кезінде Төлеубай атамыз өліп, әжеміз бала-шағасын аштан өліп қалмас үшін уақытша балалар үйіне өткізіп, аласапыран заманда олардан көз жазып қалады. Ауылда аман қалған үлкендер ақылдаса отырып, сүйенер тірегінен, бала-шағасынан тірідей айырылған қам көңіл Рахима әжемді Әлімге сіңген қырғыз руының ішіндегі Барақ, оның ішіндегі Тілеубайдан тарайтын, жұбайы қайтыс болған менің атам Айтбайға қосады. Жан-жақтағы ағайын-туыстың сүйемелдеуімен екі жарты бір бүтін болып, түтін түтетеді. Көп ұзамай өмірге менің әкем келеді. Анадай жағдайлардан кейін дүниеге келген бала тіпті тәтті көрінеді ғой, екеуі де: «Бізге бұл баланы Құдай берді...» десе керек. Сөйтіп, екі шаңырақтың өшкен отын тұтатқан сәбиге Құдайберген деген есім беріледі. Әкеміз 7-8 жасқа келгенде, тағы бір қуанышты жағдай болыпты. Әжемнің Төлеубайдан туған Аязбай деген ұлы аман табылады. Айтбай атам той жасап, бауырына басқан. Аязбай да мейірімді, елгезек бозбала екен, лезде атама бауыр басады.Менің әкем Құдайбергенді еркелетіп, ертіп жүреді екен, - дейді Қанат Айтбаев.

Оның айтуынша, Құдайберген мен Миуадан үш бала өрбіген.

- Екеуінен үш бала өрбідік - мен, әпкем Гүлзира, қарындасым Нұргүл. Мен 1993 жылы институт бітіріп, Әлімнің Шектісінен, оның ішінде Назар руының Бәшенінен тарайтын Ермекқызы Светамен шаңырақ көтердім. Аллаға шүкір, қазір екі ұлымыз, бір қызымыз бар. Ата-анамызбен бірге бір шаңырақ астында тату-тәтті өмір сүріп жатырмыз. P.S. Алатаудың бауырын мекендеген қырғыз ұлтына қатысымыз жоқ. Құдандалы, жекжатты болар кезде ғана айтылатын ру тармақтарын, өмір тарихын жариялы түрде баяндауға мәжбүр еткен "журналистерге" не дейін... - деп Қанат Айтбаев журналистерге реншінін білдірді.

Өмірзақ Шөкеев кәсіпкерлерге кепілдіксіз несие алудың жолын көрсетті
Түркістан: «Тәуелсіздік қарлығаштары» байқауы басталды


Сәйкес тақырыптар
Көтерілу
×