Қызылорда облысында мұз астына құлаған төрт адамның денесі табылды, деп хабарлайды Oinet.kz.

Қазақстан ТЖМ баспасөз қызметінің мәліметінше, 8 желтоқсанда Қызылорда облысының Арал ауданында Қамыстыбас ауылынан 35 шақырым жерде Қамбаш көлінде УАЗ маркалы автокөлік мұз астына түсіп кеткен. Салонда жеті адам болған. Олардың үшеуі өз күшімен аман қалған.

- Құтқарушылар суға батқан 1985, 1981, 1994, 1973 жылы туған төрт адамды іздеді, бірақ қараңғы түскен кезде іздеу тоқтатылды, - деді төтенше жағдайлар министрлігінің баспасөз хатшысы Талғат Уәли.

9 желтоқсан күні таңертең іздеу жұмыстары жалғасқан.

- Мұздың қалыңдығы 25 сантиметр болды. Жеті метр тереңдікте қаза тапқандардың денелері бар УАЗ автокөлігі табылды. Сағат 10.05-те ТЖД жедел-құтқару жасағының күшімен төрт адамның мәйіті алынып, полиция қызметкерлеріне тапсырылды, - деп хабарлады ТЖМ.

Іздестіру жұмыстарына ТЖД, ПД, жергілікті атқарушы органдардың күштері мен құралдары мен 27 адам, жеті техника жұмылдырылды.