Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында шағын және орта кәсіпкерлікті дамытуға, шетелдік инвестиция тарту арқылы отандық кәсіпорын қуатын арттыруды тапсырып отыр. 

«Қазіргі ең басты міндет – еліміздің мықты өнеркәсіптік негізін қалыптастыру және экономикамыз өзімізді толық қамтамасыз ете алатындай жағдайға жету. Сондықтан өңдеу саласын жедел дамытуға баса мән беру қажет», дейді Президент. Елге инвестиция тарты мақсатында Түлкібас ауданының әкімі Нұржан Ізтілеуов тиісті бөлім басшыларымен бірге Қытай елінде іссапарда барып, арнайы келіссөздерге қол жеткізді. 

- Түркістан облысының әкімі Дархан Сатыбалдының тапсырмасымен инвестиция тарту мақсатында Қытай елінде іссапарда болдық. Іссапар барысында Үрімші және Санжы қаласындағы индустриалды аймақтың басшылығымен кездесіп, келіссөздер жүргізіп, кәсіпкерлік нысандарды араладық. Ол жерде, тамақ өнеркәсібі мен ауыл шаруашылығы өнімдерін қайта өндеумен көш бастап тұрған кәсіпорындарының жұмысын бақылап, тәжірибе алмастық, - дейді Түлкібас ауданының әкімі Нұржан Ізтілеуов.

Жалпы Мемлекет басшысының инвестиция тарту бағытындағы тапсырмасына байланысты Түркістан облысында қарқынды жұмыс жүргізілуде. Бұл бағытта Түркістан облысына жыл басынан 888,5 миллиард теңге инвестиция тартылып, өткен жылдың тиісті кезеңімен салыстырғанда 17,7 пайызға артқан. Ал жыл басынан бері тікелей шетелдік инвестиция көлемі 685 миллион АҚШ долларын құрап, жылдық жоспар 1,5 есеге артығымен орындалған. 

Нұржан Ізтілеуовтың айтуынша, Мемлекет тарапынан қабылданған көптеген жобалар мен бағдарламалар бүгінгі таңда өз жалғасын табуда. Бұл ең алдымен өңірімізде қолға алынған жобалардың табысты жүзеге асуына жол ашқаны белгілі. «Өңірімізде жүзеге асырылып жатқан мемлекеттік бағдарламалардың басты мақсаты – кәсіпкерлерді қолдап, кәсіпорындардың әлеуетін арттыру болатын. Бағдарлама қаржылық қолдаудан басқа, инфрақұрылымды дамытуға да бағытталған. Осының аясында жүзеге асырылып жатқан индустриялық-инновациялық даму бағдарламасы – ел экономикасын түбегейлі жаңа сапалы деңгейге көтеріп, шетелдік инвесторларды көптеп тартуға мүмкіндік берді. Мәселен, облыс әкімі Дархан Сатыбалдының бастамасымен облысқа инвестиция тарту және тәжірибе алмасу мақсатында Қытай, Ресей, Аустралия, Өзбекстан, Қатар және Оңтүстік Корея елдеріне түркістандық кәсіпкерлердің сапарын ұйымдастырып, алпауыт компаниялармен маңызды келіссөздер жүргізілді. Нәтижесінде шетел капиталының қатысуымен жалпы құны 910 миллион АҚШ долларын құрайтын 6 инвестициялық жоба басталды. Бұдан бөлек, қазан айында Түркістан қаласына 127 шетелдік компанияны шақырып, 301 миллиард теңге көлемінде 35 меморандумға қол қойылды. Ал біз Қытайға жасаған іссапар барысында бірқатар келіссөздерге қол жеткіздік. Сол іссапар барысында жоғарыдағы тамақ және ауыл шаруашылығы өнімдерін өндеумен айналысып жүрген ірі кәсіпкерлер Донг Уонг пен Зну Мингпен іскерлік байланыс орнату бойынша екі жақты келісімшарт түзіліп, алдағы уақытта ауданда құны 28 миллиард теңгені құрайтын 3 жобаны іске асыру бойынша келіссөздер жүргізілді, - дейді 

Сонымен Түлкібас ауданының әкімі Нұржан Ізтілеуовтың айтуынша, бұл жобалар іске асқан жағдайда аймақта 410 адамға жаңа жұмыс орны ашылып, аудандық бюджетке 400 миллион теңгеден астам салық түседі деп жоспарлануда.