Еліміздегі кәсіпкерлікті дамытуға бағытталған бағдарламалар мен жобалардың барлығы да ел экономикасының әлеуетін арттыруға жұмылдырылған. Ең бастысы  – сан тараптан инвестициялар тартылуымен сан салада баламасы жоқ бірегей кәсіпорындар бой көтеруі, жүздеген жаңа жұмыс орындарының ашылуы өңір жұртшылығының тұрмысы түзеліп, бақуаттана түсуіне өз септігін тигізуде. 

Түркістан жерінің бар байлығы ел игілігі еселенуіне – кәдеге жаратыла бастауы қуантады. Бүгінгі күні инвестиция тарту аясындағы әріптестік көрші Өзбекстан Республикасымен де орнаған.

Өңіраралық әріптестікті дамыту аясында Қазақстанның Өзбекстандағы елшісі Бейбіт Атамқұловпен бірге Түркістан облысының делегациясы, сондай-ақ қазақстандық іскер топтары Жызақ облысына жұмыс сапарымен барып, әріптестік байланыс орнатты. Бұл 2024 жылдың қазан айында Самарқанд қаласында өткен Қазақстан мен Өзбекстанның IV өңіраралық форумы аясында басталған жұмыстардың жалғасы.

Делегация құрамында Жетісай ауданының әкімі Серік Мамытов пен Мақтаарал ауданының әкімі Бақыт Асанов, Түркістан облыстық кәсіпкерлік және өнеркәсіп басқармасы басшысының міндетін атқарушы Қанат Шонбасов, туризм және ауыл шаруашылығы басқармасының басшылығы, «Түркістан» әлеуметтік кәсіпкерлік корпарациясы» акционерлік қоғамы өкілдері, өңірдің кәсіпкерлері, сондай-ақ Өзбекстандағы «Astana Motors» және «Freedom broker» компанияларының өкілдері болды.

Жызақ облысының жаңадан тағайындалған әкімі Улугбек Мустафоевпен кездесуде шекара маңындағы сауданы, транзиттік-көліктік әлеуетті және туристік ынтымақтастықты қоса алғанда өзара аспектілерді талқылады. 

Елші көршілес екі ел арасындағы сауда номенклатурасын кеңейтуге мүмкіндік беретін және елдер арасындағы ортақ сауданы дамытуға ықпал ететін өңірлердің әлеуетін, облыстарда өндірілетін тауарлар тізбесін зерделеу қажеттігін атап өтіп, іскер топтар арасында тікелей байланыс орнату – экономикалық және мәдени байланыстарды нығайтуда маңызды қадам екеніне, сондай-ақ туристік маршруттарды әзірлеудің және шекара маңындағы аудандардың азаматтары үшін автобус рейстерін іске қосудың маңыздылығына тоқталды. 

Жызақ облысының әкімі сауда, туризм (оның ішәнде медициналық), білім беру және басқа да преспективалы бағыттар саласындағы бірлескен күш-жігердің маңыздылығын айтып, өңірлер арасындағы өзара іс-қимылды жан-жақты дамытуға жәрдемдесуге дайын екенін жеткізді.

Кездесу қорытындысы бойынша Түркістан облысының туризм басқармасы мен Жызақ облысының «Заамин» демалыс аймағы дирекциясы арасында ынтымақтастық туралы Меморандумға қол қойылды. Аталмыш құжат туристік әлеуетті дамытуға және өңірлер арасындағы мәдени байланыстарды нығайтуға бағытталып отыр.

- Өзбекстан Республикасына жасаған іссапар барысында маңызды құжаттарға қол қойылды. Нәтижесінде өзбекстандық және басқа да шетел капиталының қатысуымен болған келіссөздер аясында облысымызда бірқатар жобаларды жүзеге асыру көзделуде. Атап айтсақ, шетелдік инвесторлармен дрон, бейнекамера, медициналық жиhаз, тұрмыстық техника өндіретін кәсіпорындарды ашу жұмыстары басталды. Аймақта «Өнеркәсіптік жылы-жай кешені», «Алюминий бұйымдарын шығаратын зауыт», «Өнеркәсіптік тоңазытқыштар шығаратын зауыт», «Каустикалық сода, пвх, кальций карбиді, әк цемент шығаратын зауыт» жобалары жүзеге асуда. Сонымен бірге фосфорит кендерін өңдеу және мұнай өңдеу зауыттары салынуда. Алдағы уақытта түркістандық зауыттар өз елімізді және экспортты түрлі өніммен қамтамасыз ететін болады. Одан бөлек, алдағы уақытта индустриалды аймақтарда тұрмыстық техника, өсімдік майы, газ қондырғылары, лифт құрастыру, әскери палатка, санфаянс, сэндвич панелі және сусындар өндіретін зауыттар ашылады. Сонымен қатар шетелдік инвесторларды тарту мақсатында облысымызда бос кен орындары пулы құрылды. Шетелдік компанияларға мемлекеттік қолдау шаралары бойынша түсіндіру жұмыстары жүргізілуде. Түркістан облысының инвестициялық тартымдылығының презентациялық материалдары әзірленді. Инвестициялық жобалардың тизерлері әзірленді. Алдағы уақытта шетелдік инвесторлармен келісілген келіссөздер аясында аталған жобаларды жүзеге асыру арқылы 20 мыңнан астам жаңа жұмыс орны ашылып, кірістер қосымша 100 миллиард теңгеге ұлғаяды, мыңнан аса жұмыс орны ашылады деп күтілуде, - дейді Түркістан облыстық кәсіпкерлік және өнеркәсіп басқармасы басшысының міндетін атқарушы Қанат Шонбасов.