Бүгінгі күні автомобиль жолдарын қыс айларында күтіп-ұстау бойынша Созақ ауданында тиісті жұмыстар атқарылуда. Созақ аудан әкімінің орынбасары Ақәділ Сатыбалдының айтуынша, аудан орталығының ішкі жолдарын «Созақ сәулет» коммуналдық мемлекеттік мекемесі тарапынан қардан тазарту жұмыстары жүруде. 

- Мемлекет басшысы биылғы Жолдауында «Автокөлік жолдарының жай-күйі – өзекті мәселе. Мен бұл туралы осыған дейін де айттым. Биыл елімізде 12 мың шақырымға жуық жол салынып, жөнделіп жатыр» деп атап өткендей, сол жол құрылысы біздің аймақта да мақсатты атқарылуда. Жалпы осы жылдың қорытындысымен жақсы және қанағаттанарлық жағдайдағы жергілікті маңызы бар автожолдардың үлесін – 99 пайызға, ал елді мекен көшелері бойынша бұл көрсеткішті 87 пайызға жеткізу межеленіп отыр, - дейді аудан әкімінің орынбасары. 

Жуырда облыстан Созақ ауданына 27 жаңа техника жеткізіліп, коммуналдық қызмет көрсету мекемелеріне таратылған. Жаңа жеткізілген техника 12 кент пен ауылдық округтерге, сондай-ақ «Созақ сәулет» және «Шолаққорған-Су» мемлекеттік коммуналдық кәсіпорындарына табысталған. Жаңа техникалардың ауданға бөлінуі ондағы тек коммуналдық қызметтерді жаңартып қана қоймай, ауданның таза әрі көрікті болуына да үлкен мүмкіндік беретіні анық. Ауылдар мен елді мекендерді абаттандыру, көшелердің тазалығы сынды мәселелер обылыс басшысының жіті бақылауында. Ауылдарымыздың әрбір тұрғыны таза ортада өмір сүріп, туған жеріне деген сүйіспеншілігі артса, біздің мақсатымыздың орындалғаны деген сөз. Қоғамдық жұмысқа жаңа техника қосылған сайын ауданның әлеуметтік-экономикалық жағдайы да нығая түседі деген сенім басым.  

Созақ аудан әкімінің орынбасары Ақәділ Сатыбалдының айтуынша, ауданға бөлінген техника қатарында LONKING доңғалақты тиегіш, «Shacman 6x4» жүк машинасы, DongFeng ассенизаторы, бульдозер, КАМАЗ-65115 аралас жол көлігі (суару, жуу, қар тазалағыш) және қоқыс тасығыш КАМАЗ-43253 көлігі, JCB 3CX маркалы тиегіш экскаватор мен ассенизатор машинасы, сондай-ақ Газел Next автокөлігі сатып алынған. Бұл техникалар коммуналдық қызметтердің сапасын арттыруға және аудан инфрақұрылымын жаңғыртуға мүмкіндік береді. Сонымен қатар барлық 12 кент және ауылдық округке Беларус-922.3 маркалы тракторлары жеткізілген. Атап өтерлігі, жыл басынан бері 12 кент және ауылдық округке жоғарғы кеңістіктегі жұмыстарды оңтайландыратын электрлі көтергіш машиналары алынған болатын. Бұған демеушілік арқылы алынған арнайы қоқыс тасымалдауға арналған жетек, көше сыпыру және қар тазалауға қажетті жабдықтармен толықтырылған 5 жаңа Беларус 80.1 маркалы тракторлары да қосылып, жаңа техникалардың жалпы саны 44-ке жетіп отыр.

- Бүгінгі таңда, тиісті уәкілетті мемлекеттік органдармен бірлесіп 2024-2025 жылдарға «Облыстық, аудандық және елді мекендердің автомобиль жолдарында қозғалыстың шектелуі кезіндегі өзара іс-қимыл бойынша Жол картасы» әзірленіп, бекітілді. Бұл жол картасы аясында автожолдарды қысқы күтіп ұстау үшін мердігер мекемелерді анықтай отырып, қажетті инертті материалдар қорын жоспарға сәйкес толық әзірлеу, өндірістік базалары мен бокстарды, жол техникаларын қыс мезгіліне дайындау жұмыстарын жүргізілді. Сонымен қатар, жол қозғалысы қауіпсіздігін қамтамасыз ету мақсатында аса қажетті жол телімдеріне, тау асулары мен өрлерге, қарқынды қозғалысты қиылыстарға, теміржол өтпелері мен аялдамаларға тайғақтыққа қарсы материалдарды алдын ала жеткізілді. Сондай-ақ қыс айларында қолайсыз ауа-райы салдарынан автожолдарда төтенше жағдайлардың орын алуының алдын алу және жедел шаралар қабылдау мақсатында, мердігер ұйымдармен қысқы күтіп ұстауға қосалқы техникаларды тарту бойынша ниет ету келісім-шарттарын жасалды. Тапсырыс беруші және мердігер ұйымдар тарапынан тәулік бойы кезекшіліктікті ұйымдастыру шаралары жүргізілуде, - дейді аудан әкімінің орынбасары Ақәділ Сатыбалды.

Аудан орталығының жолдарын қардан тазалау жұмыстарына 6 техника мен 13 адам жұмылдырылып, қауіпсіз қозғалысты қамтамасыз ету үшін белсенді жұмыстар атқаруда. Қар тазалауға белорус 801 маркалы тракторлары мен ЗИЛ шанағы және қар тазалағыш машиналар тартылған. Жолдар мен жаяу жүргіншілер жолдары да тазартылып, тұрғындардың жүріп-тұруына ыңғайлы жағдай жасалуда. Бұл бағыттағы жұмыстар әліде жалғасуда.