Мемлекет басшысы Қасым-Жомарт Тоқаев еліміздегі демографиялық өсімге байланысты балабақша мен мектептер санын көбейтуды тапсырған болатын. Президенттің тапсырмасына сай құрылғанына жыл толған Сауран ауданындағы білім ұяларының қатары 200 орындық жаңа бастауыш мектеп балабақшасымен толықты. 

Бүгін аудан орталығы Шорнақ ауылдық округінде бой көтерген білім ошағының ашылу салтанаты өтіп, лентасы қиылды. Шараға аудан әкімінің орынбасарлары С. Садыбаев пен Е. Жанғазиев, аппарат басшысы Д. Құдияров, Шорнақ ауылдық округінің әкімі Б. Баймұратов, ардагерлер кеңесінің төрағасы С. Ахметов қатысты.

«Ауданымыз әр салада дамып келеді. Жаңа нысандар бой көтеріп, тұрғындар үшін қолайлы жағдай жасалуда.  Заманауи техникалармен, ыстық тамақпен, түрлі үйірмелермен қамтылған бастауыш мектеп балабақшасы аудан орталығындағы  бүлдіршіндердің бойына білім нәрін сіңіретін болады. Ұрпағымыз білімді болып өссін десек, оларға осындай қолайлы жағдай жасауымыз керек»,- деді аудан әкімінің орынбасары С. Садыбаев.

Мемлекеттік жекеменшік әріптестік аясында салынған «Дара бала» бастауыш мектеп балабақшасында қазақ, орыс сыныптары, ұзартылған күн тобы, сонымен қатар балаларды түрлі өнерге баулитын домбыра, шахмат, би, т.б үйірмелер бар. Болашақта  робототехника үйірмесін жетілдіру де жоспарлануда. Сондай-ақ балаларды тасымалдайтын арнайы көлік те қарастырылған.