Түркістан облысынан 246 үміткер Президенттік жастар кадр резервіне құжаттарын тапсырып үлгерген. Кандидаттардың құжаттары 2021 жылғы 30 қыркүйекке дейін pkrezerv.gov.kz сайтында қабылданады. Іріктелуге 35 жастан аспаған, жоғары білімі және кемінде бес жыл жұмыс өтілі бар, сонымен қатар, мемлекеттік тілді орташа деңгейден төмен емес деңгейде білетін Қазақстан Республикасының азаматтары қатыса алады. Бұл туралы Түркістан облысы әкімі аппаратының баспасөз қызметі хабарлады.

1 қыркүйекте Президент жанындағы жастар кадрлық резервіне екінші іріктеуі басталды. Елдің мемлекеттік сектор резерві қатарына 50 адам қабылданады деп жоспарлануда. Іріктеудің басым көпшілік кезеңдері онлайн форматта өткізіледі. Резерке алынған тұлғалар саяси лауазымдарға, «А» корпусының әкімшілік мемлекеттік лауазымдарына және «Б» корпусының басшылық лауазымдарына тағайындалуы мүмкін. Резервтің құрамында болу мерзімі үш жылды құрайды.

Іріктеудегі жаңашылдығы – үміткерлер мемлекеттік тілді меңгеру деңгейін растауы қажет. Ол ұлттық стандарттарға сәйкес орташа деңгейден (В1) төмен болмауы тиіс. Үміткерлердің мемлекеттік тілде мәтін құруы, өз пікірін дәлелді түрде жеткізуі және қарапайым диалог жүргізе алуы керек. Және осыған дейінгі іріктеуден айырмашылығы, кадрларды іріктеу процесі тек қажетті білімді, дағды мен қабілетті ғана емес, сонымен қатар үміткерлердің шынайы мотивтері мен олардың ниеттерін бағалайтын болады.