Сайрам ауданының әлеуметтік-экономикалық дамуы – тек қалалық емес, ауылдық жерлердегі өндірістік әлеуетті күшейтумен тікелей байланысты. 

Экономиканы әртараптандыру, жергілікті өнім сапасын арттыру, инвестиция тарту мен ауыл кәсіпкерлігін қолдау – бұл бағытта жүргізіліп жатқан мемлекеттік саясаттың басым бағыттары болып табылады. Қазақстан Республикасының Президенті Қасым-Жомарт Тоқаев өз Жолдауында ауыл шаруашылығы саласын елдің экономикалық қауіпсіздігі мен азық-түлік тәуелсіздігінің негізгі діңгегі ретінде атап көрсетіп, еңбек өнімділігін екі есе арттыру міндетін алға қойған еді.

Сайрам ауданында бұл міндеттерді іске асыруда нақты нәтижелерге қол жеткізген шаруашылықтардың бірі – Қарамұрт ауылдық округінде орналасқан  «Бажар Агро» шаруа қожалығы. Бұл ауыл шаруашылық құрылымы өңірлік экономиканы жандандыруда, ауыл тұрғындарын тұрақты жұмыспен қамтуда, әрі сапалы отандық өнім өндіру арқылы ұлттық экономиканың өркендеуіне үлес қосуда. 2009 жылы құрылған қожалықтың негізін қалаған іскер азамат, кәсіпкер Бабуржан Зайыров мемлекеттік қолдауды тиімді пайдаланып, кәсібін сүт өндірісіне бағыттаған. «Даму» кәсіпкерлікті дамыту қоры арқылы несие алып, Чехиядан асыл тұқымды сауынды сиырларды әкеліп, табысты кәсіпке жол ашқан. Бұл – сыртқы инвестиция мен технология трансферінің ауыл шаруашылығына тікелей ықпалының көрінісі.

Бүгінгі таңда шаруашылықта 300-ден астам  сиыр бар. Тәулігіне 4,5 тонна сүт өндірілуде. Бұл – ауылдық аймақтағы экономикалық белсенділікті арттырып, өндірістік қуаттылықты жаңа деңгейге көтеруге бағытталған нақты қадам. Өндірілген сүт арнайы санитарлық тексерістен өтіп, өңдеу зауыттарына жөнелтіледі. Бұл – өнімнің сапасы мен тұтынушы сенімінің кепілі. Шетелдік тәжірибе мен отандық жағдайға бейімделген технологияны үйлестіру – ауыл шаруашылығы саласындағы өнімділікті арттырудың маңызды тетігі. Чехиядан әкелінген сиырлар жергілікті климатқа бейім, төзімді және жоғары өнімділікке ие. Мұндай тұқымдардан 400-500 келіге дейін таза ет алуға болады, әрі олар аз ғана азықпен мол өнім бере алады.

Жануарлардың күтімі мен денсаулығына ерекше назар аударылып, заманауи ветеринарлық қызмет көрсетіледі. Бұл – сапалы ауыл шаруашылығы өнімін тұрақты өндірудің алғышарты. Қожалықта 15 адам тұрақты жұмыспен қамтылған. Олардың қатарында тәжірибелі малшылар, сауыншылар мен ветеринарлар бар. Бұл – ауылдық жерде жаңа жұмыс орындарын ашу арқылы әлеуметтік тұрақтылықты нығайтудың нақты үлгісі.

«Бажар Агро» – ауылдағы инвестицияның тиімді салынғанының, ал қолдаудың нақты нәтиже бергенінің дәлелі. Кәсіпкер Бабуржан Зайыровтың айтуынша, шаруашылықтағы мамандардың көбі бұрыннан ауыл шаруашылығында жұмыс істегендер, яғни бұл сала олардың өмір салтына айналған.

Президент Жолдауында атап өтілген «ауыл – ұлттың алтын бесігі» деген ұстанымды іске асырып жүрген осындай кәсіпкерлер елдің агроөнеркәсіптік әлеуетін нығайтып, ұлттық өнім сапасын арттыруға зор үлес қосып отыр. Мемлекеттік қолдаудың тиімді жүзеге асырылуы, заманауи технологияны қолдану, кадрлық тұрақтылық пен жоғары еңбек мәдениеті – мұның бәрі өңірдің әлеуметтік-экономикалық дамуының іргетасы бола алады. Осындай үлгілі шаруашылықтар жастардың ауылда қалып, еңбек етуге деген қызығушылығын арттырып, ауылдық жердің дамуына жаңа серпін береді. Бұл – тек бір кәсіпорынның ғана емес, тұтас елдің стратегиялық мақсаттарының жүзеге асуына қосқан шынайы үлесі.

С.АБЫЛБЕКОВА