Дұрыс ұйқы – жалқаулықпен күресу, ауру-сырқау мен артық салмақтың алдын алу құралы. Дұрыс ұйықтау арқылы біз жағымсыз әдеттерімізден оңай арылып, уақытымызды көбейтіп, жастығымызды ұзарта аламыз.

Адам түн ортасына дейін, яғни түнгі 3-4-ке дейін ұйықтап алатын болса оның көптеген артықшылықтары бар. Толығырақ тоқталайық!

1. Денсаулығыңыз мығым болады.

Егер сіз кешкі 9-да ұйқыға жатсаңыз автоматты түрде май басудың алдын аласыз. Қан қысымы көтерілмейді, бас ауруы мен шаршағандық белгілері болмайды. Ұйқы қанбаса ең алдымен зардап шегетін ағза — бауыр. Ал ертерек ұйықтасаңыз бауырыңыз да сау болмақ.

2. Жасара түсесіз.

Әйел заты үшін өзінің жас келбетін сақтау аса маңызды. Бұл үшін кешкі сағат 10-нан қалмай ұйқыға жатқан жөн. Бұл уақытта адам ағзасының жасушаларында коллаген белсенді түрде бөлінеді. Коллаген — терінің шымырлығы мен жасаруына негіз болады. Егер дұрыс ұйықтауды әдетке айналдырсаңыз бетіңіздегі әжімдердің азайғанын байқайсыз. Әрі реңіңіз де ашық болады.

3. Артық салмақ жинамайсыз.

Америкалық ғалымдар зерттеуінің нәтижесінде түн ортасына дейін ұйықтамау ағзадағы алмасу процестерін өрескел бұзатыны дәлелденді. Сол себепті де адам әдеттегіге қарағанда екі есе жылдам семіреді.

4. Ақылыңыз артады.

Үнемі ұйқысы қанбай жүру – есте сақтау қабілетін едәуір төмендетеді, адамның ақпаратты саралау қабілетін нашарлатады. Түн ортасына дейінгі ұйқы ғана бұл процестерді қалыпқа келтіре алады.

5. Бос уақытыңыз көп болады.

Ертерек ұйықтасаңыз ертерек тұрасыз. Ал таңғы уақытта береке бар. «Ерте тұрған еркектің ырысы артық, Ерте тұрған әйелдің бір ісі артық» демекші жұмыс күніңіз өнімдірек болады.

6. Жаратушының жарылқауы

Ғаламторды, теледидар мен телефонды ертерек сөндіріп, ертерек жатудағы ең маңызды дүние – таң намазына қиналмай тұрасыз.

Дұрыс ұйқы формуласы. Салауатты өмір салтына дағдыландыратын фитнес-жаттықтырушылар «10–3–2–1–0» ұйқы формуласын ұсынады.

Ұйқы алдындағы 10 сағат: ешқандай кофеин ішуге болмайды;

3 сағат: көп тамақ ішпеу қажет;

2 сағат: жұмыс істемеу керек (әсіресе компьютер алдында);

1 сағат: ешқандай экранға жол жоқ.

Ұйықтар алдындағы бұл сағаттарда серуендеуге болады.