Президент Әкімшілігі Басшысының бірінші орынбасары Дәурен Абаев энергия тапшылығының қаупіне байланысты Қазақстанда АЭС салу идеясын қолдады.

"Бізде қазірдің өзінде солтүстік пен оңтүстік арасындағы энергия теңгерімсіздігінің күрделі мәселесі тұр. АЭС – сән-салтанат емес, өмір сүруге қажеттілік. Өкінішке қарай, күн де, жел де әлі күнге дейін мұндай арзан энергияны бере алмайды. Бұл жолды қолдасақ энергия тапшылығы жойылып, экономиканың еңсесі көтеріледі", – деді Дәурен Абаев "Ашық диалог" бағдарламасында.

Ол Чернобыль атом электр станциясы мен Фукусима-1 апатына байланысты халықтың туындаған алаңдаушылығын түсінуге болатынын қосып өтті. Бұдан бөлек, қазақстандықтар Семей ядролық полигонынан алған зардаптарынан толық арылған жоқ деп есептеді ол.

"Қорқыныш әрқашан болады. Бірақ бүгінде энергетик мамандардың көпшілігі атом электр станциясын құру қажетті қадам екеніне бірауыздан келіседі. Басқа жолмен ұлттық энергетикалық қауіпсіздікті қамтамасыз ету бізге қиынға соғады. Барлық көмірмен жұмыс істейтін ЖЭО қондырғыларының жартысына жуығы ауыстыруды немесе қайта жөндеуді қажет етеді. Көмірді пайдаланудың өзі көміртегі қалдықтары деп аталатын төлемдердің енгізілуімен қымбатқа түсуі мүмкін", – деді Абаев.