Жақсылық Үшкемпіров туралы фильмнің тұсаукесері өтті

Oinet.kz 22-12-2019 1291

Алматы қаласындағы Kinoplexx Sary Arka кинотеатрында «Жақсылық» көркем фильмнің тұсаукесері өтті, деп хабарлайды OINET.KZ «Қазақфильм» киностудиясына сілтеме жасап.

Жақсылық Үшкемпіров туралы көркем фильмнің тұсаукесері өтті

Фильмнің қоюшы режиссері әрі сценарий авторы – Бақыт Қайырбеков. Көркем фильмді тамашалауға жиналған көрермен кинотеатр залында бос орын қалдырмады. Тіпті жиналғандар біразы фильмді түрегеп тұрып тамашалады. Ал көрсетілімнің соңында олар ұзақ уақыт қол соқты. ҚР Мәдениет және спорт министрлігі тапсырысы бойынша Ш.Айманов атындағы «Қазақфильм» АҚ және Mergen studio компаниясы түсірген биографиялық фильм Қазақстанның Еңбек Ері, грек-рим күресінің палуаны, Әлем чемпионы, Олимпиада чемпионы, СССР-ға еңбек сіңірген спорт шебері, Қазақ ССР еңбек сіңірген жаттықтырушысы – Жақсылық Үшкемпіровтің өмірі туралы баяндайды.

Фильмнің тұсаукесеріне ҚР Мәдениет және спорт вице-министрі Үркен Бисақаев, Қазақстанның еңбек сіңірген қайраткері, «Қазақфильм» киностудиясының президенті Арман Әсенов, режиссер Бақыт Қайырбеков бастаған фильмнің түсіру тобы және Жақсылық Үшкемпіровтің өзі қатысты.

«Бүгін қазақ киносы үшін айтулы күн – бүгін біз назарларыңызға қазақтың бағына біткен батыры - Жақсылық Үшкемпіровтың өмірі мен спорттағы жолына арналған көркем фильмді ұсынып отырмыз. Жақсылық ағамызды білмейтін қазақ жоқ. Совет заманында жауырыны жер иіскемеген балуанның спорттағы жетістіктері жылнамада жазулы. Берекелі ісімен де, жайдары-жайсаң мінезімен де көпшіліктің ықыласына бөленген ағамыздың спорттағы жетістіктері мен игілікті істері өзгелерге, əсіресе келешек ұрпаққа үлгі боларлық», - деді ҚР Мәдениет және спорт вице-министрі Үркен Бисақаев. 

«Қазақфильмнің» президенті Арман Әсенов аты аңызға айналған балуанның өмір жолы мен спорттағы жетістігіне арналған фильмнің тұсаукесеріне осыншама халық келгеніне өте қуанышты екенін жеткізді.

Режиссер Бақыт Қайырбековтің айтуынша, бұл оның көркем фильм жанрында түсірген менің алғашқы туындысы екен. 

«Картина 48 кг салмақтағы Олимпиада чемпионы болған алғашқы қазақ – Жақсылық Үшкемпіров туралы. Ол түрлі мемлекет дәрежесіндегі жарыстарға қатысып, жүлделі орындардан көрінсе де, спортшыға халықаралық ареналарға шығуға мүмкіндік бермеген. Тек 1980 жылы ғана ол Мәскеуде өткен Олимпиада ойындарына қатысуға жолдама алып, әлемдік деңгейде өнерін көрсете алды. Фильм Оңтүстік Қазақстан ауылдарының бірінде дүниеге келген спортшының балалық шағынан бастап, Олимпиада ойындарында жеткен жетістіктеріне дейінгі өмір жолын бейнелейді», - деді режиссер. 

Жақсылық Үшкемпіров фильмнің түсіру тобына, актерлерге алғыс аттйы. 

«Бұл фильм мен үшін емес, келешек ұрпақ үшін керек. Менің жолымды қуған олимпиада чемпиондары көп болсын деп тілеймін», - деді Жақсылық Үшкемпіров. 

Дайындық кезеңде ұйымдастырылған кастинг нәтижесінде Жақсылық Үшкемпіровтің жастық шағы мен ер жеткен кезін Эльнар Назарқұл, Санүржан Сүлейменов және театр актері Олжас Сақ сомдады. 

Ал 60 жастағы спортшының рөліне Қазақстанның халық артисі, Жезқазған театрының актері Досжан Жанботаев шақырылған.


Бекарыс Шойбеков енді айтысты тастай ма?
Димаштың атасы Құдайберген Айтбаев «Ерең еңбегі үшін» медалімен марапатталады
Сәйкес тақырыптар
Көтерілу