Бүгінгі күні  еліміз  сыбайлас жемқорлыққа қарсы іс-қимылдың жаңа моделдерін қолданысқа енгізіп,   патриот және бәсекеге қабілетті жас буынды тәбиелеуге айрықша басымдық беріп отыр.    

Осыған орай, бүгін  ҚР  Сыбайлас жемқорлыққа қарсы іс-қимыл агенттігінің Түркістан  облысы бойынша Департаментінің жанынан құрылған  «Түркістан-адалдық  алаңы» жобалық кеңсесі аясында Қазақ-Түрік университетінде жалынды жастарды ізгілікке бастайтын  «Ізгілік елшісі»/ «Акселератор добра» жобасы ашылып,  облыста орналасқан білім беру ұйымдарының басшылары мен «Саналы ұрпақ» қызметкерлеріне таныстырылды.     

Шараға  Департаменттің өкілдері, «Адами әлеуетті дамыту» басқармасының басшысы Р.Жолаев,  Қ.А.Ясауи атындағы Халықаралық Қазақ-Түрік университетінің  вице-президенті А.Абуов және бірқатар кәсіптік және техникалық білім беру ұйымдарының басшылары мен жобаның ерікті жастары қатысты.  

Жобаның негізгі мақсаты –  сыбайлас жемқорлықсыз орта қалыптастыру, облыстағы білім беру ұйымдарының жастарын ортақ игі іске жұмылдыру және  жақсылық жасағысы келетін жастар мен көмекке мұқтаж адамдар арасында тікелей байланыс орнату. 

Жиын барысында  ҚР  Сыбайлас жемқорлыққа қарсы іс-қимыл агенттігінің  Түркістан облысы бойынша Департаменті басшысының бірінші орынбасары Ғанижан Асанұлы  «Түркістан – Адалдық алаңы»  жобалық кеңсесі өскелең жас ұрпақты   ізгі қасиеттерге баулып,  қайырымды істерге шақыру мақсатында  «Ізгілік елшісі» жобасын жолға қойғандығын атап өтті.  

Сондай-ақ, аталмыш жобаның студенттерден құралған еріктілерден тұратынын және  азаматтық қоғамның белсенділігін арттыруға бағытталғанын тілге тиек етіп,  мемлекеттің негізі – жастарды жақсылықтың жаршысы етуде бұл жобаның берері көп екендігін жеткізді. 

Айта кетсек,  аталған жоба  алғаш рет Алматы қаласындағы  «Сорбонна - Қазақстан» институтының  бастамасымен ашылған болатын.