Президент биылғы «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында қоғамда заң мен тәртіп идеологиясын терең орнықтыру қажет екенін тапсырды. 

«Азаматтарымыздың құқығын қорғау саласында кешенді шараларды қолға алдық. Негізгі мақсат – әділетті қоғам құру және соның арқасында дамудың сара жолына түскен озық ел болу. Сондықтан біз осы бағыттағы маңызды реформаларды жалғастырамыз, жүйелі жұмысты тоқтатпаймыз. Тағы бір мәселе – азаматтардың қауіпсіздігі. Жеке адамнан бастап тұтас қоғамның қауіпсіздігін қамтамасыз ету – мемлекет үшін стратегиялық маңызы бар басымдық» деді Президент Жолдауында. Осыған орай Сайрам ауданы әкімдігі жанындағы құқықбұзушылық профилактикасы жөніндегі ведомствоаралық комиссияның кезекті отырысы өтті. Жиынға аудан әкімі Арман Сәбитов төрағалық етті. 

Жиында алаяқтық қылмыстардың алдын алу, оның ішінде қаржы пирамидаларының қызметінің профилактикасы, заңсыз ойын бизнесімен күрес, заңсыз ойын бизнесі қылмыстарының алдын алу, салық саласындағы әкімшілік құқықбұзушылықтардың алдын алу, анықтау, жолын кесу және ашу жөніндегі атқарылған жұмыстар туралы мәселелер көтерілді.

- Президентіміз Қасым-Жомарт Тоқаев Жолдауында құзырлы органдардың бәрі заңға бағынатын жұртқа зардабын тигізіп жатқан алаяқтыққа және сол сияқты басқа да заңсыз әрекеттерге қарсы батыл шаралар қабылдауға тиіс екенін тапсырды. Президент: «Қазір «Құқық бұзушылықтардың алдын алу туралы» заң жобасы әзірленіп жатыр. Осы заңның талаптарын орындау үшін қоғам мен мемлекеттік аппарат күш жұмылдыруы керек. Сонда ғана жағдайды түзетіп, заң үстемдігін және азаматтардың қауіпсіздігін қамтамасыз ете аламыз» деді Президент. Кез келген қоғамның, соның ішінде біздің қоғамның да басты ұғымдарға негізделген сұраныстары – әділдік және қауіпсіздік. Осы негізгі сұраныстардың толығымен өтелуі мемлекеттің тиімді жұмыс істейтінін айқын көрсетеді. Біз де заң талаптарының бұлжымай орындалуын қадағалауға тиіспіз, - деді аудан әкімі Арман Сәбитов.

Сондай-ақ жиында аудандық полиция, аудандық кірістер басқармаларының өкілдері мен Ақсукент, Манкент, Қарабұлақ ауылдық округтері әкімдері бұл бағытта атқарылып жатқан жұмыс барысымен бөлісті. Жиын төрағасы алаяқтық, заңсыз ойын бизнесі қылмыстарының алдын алу және оларды анықтау аясында зерделеу жұмыстарын жүйелі жүргізуді, мекемеаралық бірлескен профилактикалық іс-шараларды тұрақты түрде өткізуді тапсырды тиісті бөлім басшыларына. Сондай-ақ құқықбұзушылық пен қылмыстың алдын алу арқылы азаматтардың қауіпсіздігін қамтамасыз ету қажеттігін айтты. Сонымен бірге салық саласында салынған әкімшілік айыппұлдардың толық көлемде өндірілуін, аудан көлемінде көлеңкелі экономикаға қарсы күрес жұмыстарын күшейту керектігін жеткізді.