Мемлекет басшысы Қасым-Жомарт Тоқаев әрбір халыққа арнаған Жолдауында шағын және орта бизнесті мейлінше дамытуға басымдық беріп келеді. Президент Жолдауда «Мемлекет қаржылай қолдау жасаған кезде бәсекеге қабілетті шағын және орта бизнес өкілдеріне баса мән береді. 

Еңбекақы төлеу қорын көбейткен және салық төлемдерін арттырған кәсіпорындарға қолдау көрсетіледі. Бұл негізгі талап», деп айқындай түскен.  Бүгінгі күні Түркістан облысындағы кәсіпкерлердің қаржылық мәселесін шешіп, екінші деңгейлі банктерден несие алуына облыстағы «Даму» кәсіпкерлікті дамыту қоры» акционерлік қоғамы он ек жылдан бері қолдау көрсетіп, жұмыс істеп келеді. Төлеби ауданы, Тасарық ауылдық округіндегі бірқатар жеке кәсіпкерлер де осы қордың көмегіне жүгініп өз кәсіптерін дөңгелетуде. Соның бірі – Тасарық ауылдық округінің тұрғыны Сабыржан Танабаев.

Төлеби ауданының әкімі Еркеғали Әлімқұловтың айтуынша, «Даму» қорының көмегіне сүйеніп, бизнесін жолға қойған кәсіпкерлер қатары соңғы жылдары Төлеби ауданында арта түскен. «Жалпы бұл «Қордың мақсаты – Қазақстанда шағын және орта бизнесті дамыту. Қордың миссиясы қолдау көрсетудің кешенді және тиімді құралдарын іске асыру арқылы Қазақстанда микро, шағын және орта кәсіпкерліктің тұрақты дамуындағы белсенді рөл болып табылады. Аталған қордың кәсіпкерлікті қолдау жөніндегі негізгі құралдары екінші деңгейдегі банктер арқылы жеке кәсіпкерлік субъектілерін қаржыландыру, пайыздық мөлшерлемелерді субсидиялау, банктер алдында кепілдіктер беру, лизингтік мәмілелерді, микрокредиттік ұйымдарды және басқа да қаржы институттарын жеңілдікпен қаржыландыру», - дейді ол. 

- Президентіміз Жолдауында шағын және орта бизнесті көтеруге үлкен басымдық берді. Мәселен, Президент тапсырмасымен қолға алынған «2021-2025 жылдарға арналған кәсіпкерлікті дамыту жөніндегі ұлттық жоба» және «Қарапайым заттар экономикасы» бағдарламаларын іске асыру шеңберінде «Даму» қоры біздің өңірдегі кәсіпорындарға пайыздық мөлшерлемені субсидиялау және кепілдік беру түрінде қолдау көрсетуде. Сондай-ақ «Даму» Қоры субсидиялау, кепілдік беру және жеңілдікті қаржыландыру құралдары арқылы шағын және орта бизнеске қолдау көрсетеді. Субсидиялау кәсіпкерлерге несие бойынша пайыздық мөлшерлемені төмендетуге және сәйкесінше ай сайынғы төлемдерін азайтуға мүмкіндік береді. Бұл кәсіпкерлерге үнемделген қаражатты өз ісін дамытуға бағыттауға жол ашады. 2024 жылдың маусым айынан бастап «Даму» Қоры «Кең дала 2» жаңа бағдарламасы аясында көктемгі егіс және егін жинау жұмыстарына бағытталған агроөнеркәсіптік сектордағы жобаларға кепілдік бере бастады. Кепілділігі жеткіліксіз кәсіпкерлерге несиенің 85 пайызына кепілдік ұсынылды. Несиені «Аграрлық несие корпорациясы» акционерлік қоғамы, екінші деңгейлі банктер, несие серіктестіктері береді. Жеңілдікті сыйақы мөлшерлемесі жылдық 5 пайыз. Жалпы, Төлеби ауданында бағдарлама жүзеге асырыла бастағалы бері несиенің жиырмаға жуық жобаға қолдау көрсетілді, - дейді аудан әкімі Еркеғали Әлімқұлов. 

Бүгінгі күні жеке кәсіпкер Сабыржан Танабаев Тасарық ауылдық округіндегі тастақ жерді техниканың күшімен игеріп, жүзімбақ орналастырды. Жүзімдік бағы алғашқы өнімін берді. Кәсіптен түскен табыс есебінен жаңа жыл мерекесі қарсаңында ауыл азаматтарына демеушілік жасауда. Демеушіліктің ең үлкені жеке кәсіпкер Сабыржан Танабаев округтегі жалғыз басты анаға өз қаржысы есебінен тұрғын үй құрылысын жүргізіп, жаңа үй салып берді. Кәсіпкер тұрғын үйді қажетті сантехникамен жабдықтап, сыртқы қоршауын да тұрғызып берген. Тұрғын үй заманауи үлгіде толық әрленген. 

Көпбалалы ананың да алғысы шексіз. Жаңа жыл қарсаңында үйлі болып, оны құттықтауға келген аудан әкімі Еркеғали Әлімқұлов пен аудандық мәслихат төрағасы Нұрлан Қойбағаровтың көзінше жеке кәсіпкер Сабыржан Танабаевқа көпбалалы ана алғысын жеткізді.

Елімізде осындай жомарт жандар көп болсын!