Мемлекет басшысы Қасым-Жомарт Тоқаев «Әділетті мемлекет. Біртұтас ұлт. Берекелі қоғам» және биылғы «Әділетті Қазақстан: заң мен тәртіп, экономикалық өрлеу, қоғамдық оптимизм» атты Жолдауларында көлік-логистика инфрақұрылымының тиімділігін арттыру, елдімекендерді таза ауыз сумен қамту жайын назардан тыс қалдырмаған еді.

Президент ішкі өңірлік қатынастарды жақсарту үшін автожолдардың жергілікті желісін жөндеу мен қайта салу бағытындағы жұмыстарды ұйымдастыруға, қаржы бөлуге өңірлердегі барлық әкімдіктердің белсенді қатысуын талап еткен болатын. Сонымен қатар халықты тұрғын үймен қамтуды тапсырған еді. міне, бүгінгі күні бұл бағыттағы жұмыстар Созақ ауданында жоспарға сәйкес жүзеге асырылуда. 

- Жайлылық дегеніміз – ең алдымен, тұрғын үйдің қолжетімділігі, ауланың әдемілігі мен қауіпсіздігі, тіршілікке және жұмысты істеуге қолайлы елді мекеннің сапалы инфрақұрылымның болуы. Осы бағытта қабылданған мемлекеттік бағдарламалар мен жобалар бүгінде аймақта табысты іске асырылуда. Бүгінгі күні Созақ ауданда әлеуметтік тұрғыдан осал топтарға жататын азаматтарға арнап салынған жаңа баспаналардың құрылысы аяқталып, ел игілігіне ұсынылды. 48 отбасы баспаналы болып, жаңа пәтерлерінің кілттерін алды, - дейді ол игі шараның куәсі болған Түркістан облысы әкімінің орынбасары Нұрбол Тұрашбеков.

Жаңа баспаналар сыртынан әсем травертинмен әрленіп, аулалар темір қоршаумен қоршалған. Су және жылу жүйелері толықтай орнатылып, үй ішіндегі қабырғалар сәнді түсқағаздармен безендірілген. Едендер мен басқа да қажетті құрылғылар тұрғындардың жайлы өмір сүруіне барынша жағдай жасалған. Әрбір пәтердің жалпы алаңы 71,1 шаршы метрді құрайды, бұл өз кезегінде отбасылардың өмір сүруі үшін қолайлы әрі ыңғайлы орта қалыптастырады.

«Биыл облыс көлемінде әлеуметтік жағынан осал топтағы азаматтардың өмір сапасын жақсарту үшін бірқатар маңызды шаралар қолға алынды. Бұл жұмыстар облыс басшысының тікелей бақылауында. Жеке инвесторлармен бірлесіп, тұрғын үй құрылысын жүйелі түрде жүргізіп жатырмыз. Ел игілігіне ұсынылған әрбір баспана аудан тұрғындарына жайлы әрі заманауи қолайлы орта сыйлайды. Біз үшін басты мақсат – тұрғындардың жайлы өмір сүруі», – деп тұрғындардың сапалы әрі жайлы өмір сүруі үшін барлық жағдай жасалған жаңа баспаналар аймақтың әлеуметтік инфрақұрылымын жаңғыртуға қосылған үлкен үлес екенін де тілге тиек етті. 

– Мемлекет басшысының тапсырмасымен жүзеге асырылып жатқан мемлекеттік бағдарламалар тұрғындарымыздың жайлы өмір сүруіне, баспана және жұмыспен қамтылуына бағытталған. Мәселен, жуырда Түркістан қаласында кезекте тұрған 500-ден аса отбасы көптен күткен пәтеріне қол жеткізіп, қоныс тойын тойлауға мүмкіндік алса, алда 990 отбасын баспанамен қамту жоспарлануда. Біз алдағы уақытта да Мемлекет басшысы Қасым-Жомарт Тоқаевтың Жолдауынан туындаған міндеттерді басшылыққа ала отырып жұмыс істейтін боламыз. Ал жоғарыда айтқан жұмыстар мен алдағы уақытта атқарылатын жобалардың барлығы да ел үшін атқарылатын болады, оның игілігін ел көретін болады. Әрине бұл жұмыстар Созақ ауданында да жалғасатын болады, - дейді Түркістан облысы әкімінің орынбасары Нұрбол Тұрашбеков.