Түркістан облысында тағы бір ірі өндірістік кешен салынады. Облыс әкімі Дархан Сатыбалды инвесторлармен кездесу өткізіп, көкөніс базасының жобасын жан-жақты талқылады. Нәтижесінде, облыс әкімдігі мен азық-түлік компаниясы басшылығы арасында ынтымақтастық туралы меморандумға қол қойылды.

 Келісім аясында көкөніс базасы Түркістан облысындағы индустриалды аймақта орналасады. Онда көкөніс кептіретін, яғни пияз және сарымсақтан өнім түрлері мен биологиялық белсенді қоспалар және мал азығын шығаратын өндірістік кешеннің құрылысы жоспарланған. Жоба құны $30 миллион долларды құрайды.

«Біз бір жыл бойы Түркістан облысында көкөніс егу саласын зерттеп көрдік. «Алтын кемел» компаниясының директоры Ян мырза сегіз жылдан бері Түркістан облысында жұмыс атқарып келеді. Нәтижесі өте жақсы. Содан кейін осындай жобаға инвестиция құюды құп көріп отырмын»,- деді qingdao wanlin food компаниясының директоры Ли Янтао.

Дегидрленген көкөніс зауыты бар заманауи кешен құрылысының бірінші кезеңінде 50 мың тонна дайын өнім өндіріледі.

Жаңа өндіріс орнының іске қосылуы өңір халқының әл ауқатын жақсарта түспек. Ең бастысы – жаңа жұмыс орындары ашылады. Облыс әкімі Дархан Сатыбалды жаңа жобаның сәтті жүзеге асуына тілектестік білдіріп, инвесторларға мемлекет тарапынан жан-жақты қолдау көрсетілетінін айтты.

 Wanlin Group 1991 жылы құрылған, компания қарттарға күтім жасау және азық-түлік өндірісі секілді екі негізгі бағытта жұмыс істейді. Компания Nestle, Unilever, Kerry және т. б. ірі серіктестермен жұмыс істейді.