Оқушыларға мектеп формасын кию міндеттелмейді, сабаққа еркін және ұқыпты киімде қатысуға рұқсат етіледі. Бұл туралы бүгін Өңірлік коммуникациялар қызметінде өткен брифингте Адами әлеуетті дамыту басқармасының басшысы Рақымбек Жолаев мәлімдеді. Оның айтуынша, Түркістан облысындағы мектептер IV тоқсанда оқытудың аралас форматына көшеді. Яғни, пәндердің бір бөлігі дәстүрлі түрде, бір бөлігі қашықтан оқытылады. Ал, 300 оқушыға дейінгі контингенті бар білім ұялары дәстүрлі жұмыс режимін жалғастыра береді.

Басқарма басшысы министрлік негізгі пәндерді штаттық форматта, музыка, көркем еңбек, информатика, құқық негіздері, графика және жобалау, кәсіпкерлік және бизнес негіздері сияқты пәндерді қашықтан өткізуді ұсынғанын жеткізді.

– Баршаға мәлім 25 наурызда Мемлекеттік бас санитарлық дәрігердің коронавирустық инфекцияны таратуға жол бермеу бойынша жаңа қаулысы шықты. Осыған байланысты биылғы оқу жылының соңғы тоқсанындағы оқу процесіне аз-кем өзгерістер енгізіліп отыр. Алдағы күндері 1 сынып – 1 кабинет қағидаты бойынша сыныптарды 25 оқушыдан артық толтырмай оқытуға жол беріледі. Сабақтың ұзақтығы – 40 мин. Ауысымдар бойынша сыныптар санын, сондай-ақ жекелеген пәндерді қашықтан оқытуды мектеп белгілейді. Ерекше жағдайларда ата-аналардың өтініші бойынша балаларды қашықтан оқыту форматында қалдыруға рұқсат етіледі. Мектептерде оқу процесін ұйымдастыру кезінде барлық эпидемияға қарсы іс-шаралар қарастырылатын болады, – деді Р.Қуатбекұлы.

Айта кетейік, облыста III-тоқсанда 13 2064 оқушы дәстүрлі форматта, 28 6168 оқушы қашықтан оқытылған.