Мейрамбек Беспаевтың жеке өмірі 

Талай қыздың арманына айналған қоңыр дауысты әнші 2004 жылы отау құрды. Ол өзінен он жас кіші Мархабат есімді аруға үйленген. Бүгінде ерлі-зайыпты Кәусар және Әбухайыр есімді екі бала тәрбиелеп отыр. 

"Біреуге ес-түссіз ғашық болдым деп айта алмаймын. Қарамасаң өлем-күйем деген жағдайға да барған емеспін. Шыны керек, көбіне гастрольдік сапарларда жүретіндіктен, менде мұндай жүрістерге аса көп уақыт та бола бермейтін. Мен сүйгеніме қосылған адаммын. Жарыма ғашық болдым. Осыған қуанам, тәубе деймін. Шын сүйгендер қосылмайды дегенге өз басым сенбеймін. Бұл деген сезімге қатты беріліп кеткен адамдардың әңгімесі деп ойлаймын. Тіпті кейбір адамдар бақытының қасында жүргенін де байқамайды. Сондықтан айтарым, қасыңдағы адамыңды бағалай білу керек". 

Үйден гөрі түзде көп жүретін Мейрамбек ата-анасының, отбасының қасында жиі бола алмайтынына қынжылады. 

"Өзімді керемет әкемін деп айта алмаймын. Өйткені үйде көп бола бермеймін. Балаларымның тәрбиесімен көбіне Мархабат, туысқандар айналысқаннан кейін, өзімді керемет әкемін деп санай алмаймын", — дейді ол. 

Сәкен Майғазиевтың жеке өмірі 

Әнші жұбайы Динарамен алғаш рет Жүсіпбек Елебеков атындағы республикалық эстрада-цирк колледжінде танысқан. Болашақ жарына бір көргеннен ғашық болыпты. 

"Ең алдымен көзіне, сосын өзіне ғашық болдым. Адам ретінде өзіндік пікірі мен ұстанымының барын, сонымен қатар, оның маған жар болғанға дейін ерке бойжеткен емес, өнегелі отбасының тәрбиесін сіңірген қыз болғанын бағаладым. "Иә" деген сөзін күткен 4 аптам төрт ғасырдай болды мен үшін. Уақыт өте келе анам Алматыға келгенде, Динараны үйге апарып, таныстырдым. Анам: "бұдан артық келіннің керегі жоқ!" деп бірден ризашылығын білдірді", - деп еске алады әнші. 

Үш жыл бойы көңіл жарастырған екі жас бір-бірін ұзақ уақыт зерттеп, соңында шаңырақ көтеруге бел буған.

Бүгінде ерлі-зайыпты – төрт баланың ата-анасы. Үлкен ұлы Әділет 1998 жылы дүниеге келген. Араға он бес жыл салып, отбасы  Райана есімді қызбен толығады. 2016 жылы Мәриям есімді қыз дүниеге келеді. Ал биыл Сәкеннің отбасында тағы бір қуаныш болды. Үшінші қызы дүние есігін ашты, әнші төртінші баласының есімін Сәфия деп қойған.

Кенжебек Жанәбіловтің жары Жамилә Төлегенова

"Әншіге тұрмысқа шығамын деп мүлдем ойлаған жоқпын. Басында қорқыныш болды. Ән жазса, ең алдымен, менімен бөліседі. Оның бір жақсы қасиеті  - ренжітсе де, көңілді аулауға тырысады. Адам қанша көңілін қалдырса да, ол адамға ренжімейді. Кейде сол қасиетіне таңғаламын. Жаратылысы мен пейілінің кеңдігі шығар деп ойлаймын", - деді Кенжебек Жанәбіловтің әйелі Жамилә Төлегенова.

Ол жұбайының отбасына қаншалықты көңіл бөлетінін, бала тәрбиесіне деген көзқарасын да айтып берді. 

"Қолы бос болғанда отбасына көңіл бөледі. Негізі, қатал әке. Көп нәрсеге рұқсат бермейді. Туыстарына жақсы көңіл бөледі. Өз жұртым, қайын жұртым деп бөлмейді. Екі жаққа бірдей қарайды. Бірдей бөліседі. Арманы – бала-шағамызды жақсы тәрбиелеу, ұлымыз жақсы жерден келін алса екен. Қыздарым жақсы жерге тұрмысқа шықса екен деп көп ойлайды", - деді әншінің жары. 

Жамилә Төлегенова жұбайы өнер адамы болғандықтан, тез толқып кететінін жасырмады. 

"Әке-шешеден ерте айырылғаннан кейін жылап алатын кездері болады. Сағыныш болады. Кенжебек те, мен де анамыздан ерте айырылғанбыз. Сондықтан ол да көрсетпей жылап алады, мен де көрсетпей жылап аламын. Өнер адамы болғандықтан, жүрегі жұмсақ. Тез көңіліне алып қалады, тез толқып кетеді", - деді Жамилә Төлегенова.