Құдай жаман аурудың бетін әрі қылсын. Дегенмен өмір болғасын адамдар  түрлі жағдайларға ұшырап жатады. Өмір мен өлім арасында науқастар көбінесе жан сақтау бөлімінің төсегіне таңылады. Мұндай жағдайда пациенттің жүрек қағысын бақылау үшін дәрігерлер электрокардиографты қолданады. Мониторда жоғары төмен жылжып тұратын сызықтарды бейнелейтін осы бір құрылғыны кім ойлап тапқанын білесіз бе? 

Бүгінде медицинада кеңінен қолданылатын аппаратты 1887 жылы Лондон госпитальінің медицина қызметкері Августус Уоллер өте қызық жағдайда ойлап тапқан екен. Оның қиялына шабыт берген кәдімгі ойыншық темір жол. Алайда өнертапқыштың ойыншықтың жылжымалы фотопластинкасына қарап құрастырған аппараты тәжірибеде қолдануға дайын болмай шықты.