Бір қарт ұста күні-түні тынбай іс соғып отырады екен. Оған көрші, заманындағы бір зор бай Броун дегеннің баласы ойнап жүріп, қызыққа күнде ұстаға келіп, іс соққанына қарап тұрады екен. Бір күні ұста мырзаға айтты: - Төрем, қарап тұрғанша, тым болмаса, шеге соғуды үйренсейші, кім біледі, бір күндерде сол өнердің де керегі болар.

Бала нем кетеді деп, күнде ермекке шеге соғып жүріп, бірнеше күнде жақсы соғуға үйреніпті.

Мұнан бірнеше жылдар өткен соң, жұртында қатты жаугершілік басталып, Броунның мал-жаны таланып бітіп, өзі әйел, бала-шағасымен қашып шығыпты. Сонымен ішіп-жеуге, киюге деп кем-тар соғып, бір қалада жүрген уақытта қаланың әкімі бұйрық шашты: «Әскерге көп етік керек, жақын жердегі қалалардың сататын мығы (шегесі) таусылды, мық даярласын!» деп. Сонда манағы мырзаның үйренген өнері есіне түсіп, патшалық етікшілерге хабар салды: - Егер көп мық-шеге керек болса, мен пәдіретін аламын,-деп.

Етікшілер істеген мығын көріп ұнатқан соң, әскердің етігіне мық істеудің міндетін алып, көп мал тауып, ақыр өміріне дейін кемдік көрмей өтіпті-міс.