Ішкі істер министрлігінің Қылмыстық-атқару жүйесі комитетінің төрағасы Жанат Ешмағамбетовтің айтуынша, соңғы тоғыз жылда түрмедегілердің саны 57 мыңнан 30 мыңға азайған. Әлемдік рейтингте сотталғандар саны бойынша Қазақстан соңғы 18 жылда үшінші орыннан 100-інші орынға түсіпті деп хабарлайды Oinet.kz тілшісі.

Яғни, Қазақстан халқының 0,2%-ы түрмеде отыр.

«Бүгінгі таңда Қазақстанның пеницетарлық жүйесінде 82 мекеме бар, оларда 30 мыңға жуық адам отыр: абақтыларда – шамамен 25 мың сотталушы, 16 тергеу изоляторында – 5 мыңнан астам сотталушы бар», – деді ҚАЖК басшысы. Сотталғандардың тамағына бөлінетін ақша биылдан бастап 1,5 есе ұлғайтылмақ. Жанат Ешмағамбетовтің мәлімдеуінше, тамақтану нормативі Қазақ Тамақтану академиясының ұсынысы бойынша үкімет қаулысымен бекітілген. «Азық-түлік тізімі 26 аталымнан тұрады. Бүгінгі таңда тәуліктік норма бір адамға 630 теңгені құрайды. Қазіргі таңда министрдің тапсырмасымен біз бұл мәселені қарап жатырмыз. Азық-түліктің бұл тізімін 26-дан 32 аталымға дейін көбейту жоспарлануда. Сонымен қатар азық-түлік түрі де, сапасы да, күнделікті норма салмағы да арттырылады. Келесі жылдың басынан бастап күнделікті норма 1050 теңгені құрайтын болады», - деді комитет төрағасы брифингте.

Сондай-ақ оның айтуынша, «қазіргі бағаны және құқыққорғаушылардың ұсыныстары ескеріле отырып, тамақ барынша әр түрлі және салмағы бойынша барынша көлемді болуы тиіс».