Бауыржан Байбек өз жұмысына жауапсыз қарайтын партия мүшелерін саяси ұйым қатарынан шығарып тастау қажеттігін айтты, деп хабарлайды OINET.KZ сайтының тілшісі sputniknews.kz сайтына сілтеме жасап.

Бүгін Қызылорда облысынан байланысқа шыққан жергілікті комиссиясының төрайымы Аида Әбибулаева партиялық бақылау комитетінің отырысында бірқатар мәслихат депутатының жұмысына арызданды. Партияның жұмысына жауапсыз қарайтын депутаттардың аты-жөнін де жариялады.

"Жалпы, 1 539 адамның мәселесі шешілді. Депутаттар өз кезегінде 646 адамды қабылдап, сан алуан сұрақтардың шешілуіне өз септігін тигізді. Алайда кейбір басшылар мен депутаттар партияның қоғамдық қабылдауында азаматтармен кездесуге және халықтың арыз-шағымдарына формалды түрде қарайды. Мәселен, депутаттар Жансақалов, Мақашев пен Махамбетов халықпен кездесуге бірнеше рет келмей қойған. Облыстық департамент басшылары Орынов, Бәйменова, Өтегенова, Мелдібекова мен Сұлтангереев тура солай істеді", - деді Әбибулаева.

"Nur Otan" партиясы төрағасының бірінші орынбасары Бауыржан Байбек осы мәселеге қатысты өз ойын білдірді.

"Сіз нақты фактілер мен фамилияларды атадыңыз. Өте дұрыс. Олардың қоғамдық қабылдауға неге келмегенін зерделеу керек. Егер ол партия мүшесі ретінде білсе, кестені көрсе, ал қоғамдық қабылдауға келмеген болса, оның партиялық жауапкершілігін қарау қажет. Тіпті, партия қатарынан шығарып тастауға дейін шара қолданған жөн", - деп атап көрсетті Байбек.

Бауыржан Байбектің сөзіне қарағанда, бүгінде партия қатарына кірген мемлекеттік қызметкерлердің саны 6 процентті құрайды. Қалғаны – қарапайым халық.

"Біздің қатарымызда қойшы да, мұғалім де бар. 6 проценті – мемлекеттік қызметкерлер. Бірақ дәл осы 6 процент үнемі қоғамның бақылауында жүреді. Бүгінде нақты тәртіп бар. Адамдар сол тәртіптің сақталғанын қалайды. Сол себепті партиялық тәртіпті күшейтуіміз керек. Сөз бердік пе? Оны орындау қажет", - дейді Байбек.