1941-1945 жылғы Ұлы Отан соғысына аттанған әрбір екінші жауынгер туған жерге қайта оралған жоқ. Төрт жылға созылған сұм соғыс қазақ жерінде жүз мыңдаған адамның өмірін жалмады.   Соғыс қасіретін тартпаған шаңырақ, ауыл жоқ. 

1945 жылы Жеңіс күнінде әскерге жаңа алынған, сол кездегі 17-18-дегі  қылшылдаған жігіттердің өзі бүгінде жүзді алқымдап қалды.

Ардагерлер кеңесінің мәліметі бойынша бүгінде Түркістан облысында көзі тірі   22 майдангер,  4838 тыл ардагері бар. 2020 жылы майдангерлердің саны 41 болған екен. 

Биыл Жеңістің 77 жылдық мерекесінде ардагерлерге жылдағы үрдіс бойынша сыйлықтар жасалады. Әр майдангерге 1 миллион 110 мың теңгеден беріледі. Облыстық Ардагерлер кеңесінің ұйымдастыруымен  «77 жылдыққа 77 іс-шарасы» өтіп жатыр. 

Шымкент қалалық жұмыспен қамту және  әлеуметтік қорғау басқармасының мәліметі бойынша үшінші мегаполисте майдангерлерге тиісті сыйақылары есеп шоттарына аударылып қойылған. Шымкенте биыл көзі тірі 7 ардагер бар. Былтыр олардың саны 21 болған екен.

Мегаполисте ең жас майдангер биыл жүзеге толады.