Қазақстанда жер сатуға тыйым салуды қарастыратын заң жобасы Мәжілісте қабылданды, деп хабарлайды Oinet.kz тілшісі.

- Қазақстан Республикасының кейбір заңнамалық актілеріне жер қатынастары мәселелері бойынша өзгерістер мен толықтырулар енгізу туралы" заң жобасы Қазақстан Республикасының Президенті Тоқаевтың заңнамалық бастамасы тәртібімен енгізілді. Заң жобасын қабылдаудың мақсаты шетелдіктерге, азаматтығы жоқ адамдарға, шетелдік заңды тұлғаларға, шетелдік қатысуы бар Қазақстан Республикасының заңды тұлғаларына, халықаралық ұйымдарға, сондай-ақ ауылшаруашылығының халықаралық қатысуы бар ғылыми орталықтарына жеке меншік құқығы негізінде және уақытша жер пайдалану құқығындағы жер учаскелеріне иелік етуге тыйым салу болып табылады, - деді депутат Ерлан Барлыбаев пленарлық отырыста жер қатынастары мәселелері жөніндегі заң жобасын таныстыра отырып.

Ол Аграрлық мәселелер жөніндегі комитеттің осы заң жобасын жұмысқа қабылдауға және ол бойынша қорытынды дайындауға дайын екенін баса айтты.

Ақпан айында Президент Қасым-Жомарт Тоқаев шетелдіктерге Қазақстандағы ауылшаруашылық жерлерін сатып алуға немесе жалға алуға шұғыл тыйым салу туралы бұйрық берді. Мемлекет басшысы мұны Президенттің заңнамалық бастамасы тәртібімен жасалу керектігін айтты.

- Жер мәселесі халқымыз үшін әрқашан өте маңызды болған. Ол - біздің мемлекеттілігіміздің берік негізі және қасиетті белгісі. Мен қазақстандық жер шетелдіктерге сатылмайды деп бірнеше рет айттым. Бұл проблема төңірегіндегі алып-қашпа сөздерді тыю керек, - деді Мемлекет басшысы Ұлттық сенім кеңесінің отырысында.